Највисоките институции на Европската Унија дадоа зелено светло за „развод“ со Велика Британија. Претседателите на Европската комисија и на Европскиот совет Урсула фон дер Лајен и Шарл Мишел, го потпишаа договорот со кој Британија ќе треба да почне да ја напушта Унијата од 31 јануари.
„Шарл Мишел и јас тукушто го потпишавме Договорот за повлекувањето на Обединетото Кралство од ЕУ, што го отвора патот за негово ратификување од Европскиот парламент“,
посочи шефицата на Комисијата, Урсула фон дер Лајен.
Со официјалното потпишување, договорот на 29 јануари ќе биде поднесен и во Европскиот парламент на ратификување. Потоа, дипломатите од државите членки на ЕУ ќе треба и писмено да го одобрат договорот, со што ќе го гарантираат напуштањето на Велика Британија на заедницата точно на полноќ на 31 јануари.
„Нештата неизбежно ќе се сменат, но нашето пријателство ќе остане. Почнуваме ново поглавје како партнери и сојузници“,
порача претседателот на Европскиот совет Шарл Мишел
Неколку дена пред официјално Велика Британија да излезе од Европската унија, законот го потпиша и британската кралица Елизабета Втора, соопшти британската влада.
„Нејзиното Величество даде кралско одобрение на текстот со кој се регулираат условите за развод на Велика Британија по 47 години бурен брак со ЕУ“,
соопшти на Твитер соопшти британскиот министер за Брегзит, Стив Баркли.
Периодот на транзиција на Велика Британија е предвиден да заврши на заврши на 31 декември 2020 година. Во тој период таа ќе остане дел од царинската унија и заедничкиот пазар, но нема да има свои членови во Европскиот парламент и политичките институции.