Еврокомесарот за проширување, Оливер Вархеји, идната недела ќе ги посети земјите од Западен Балкан, а целта на посетата, како што соопшти Европската комисија, е пристигнувањето на првите вакцини „Фајзер“ кои ги обезбеди ЕУ како помош за земјите од регионот. Според агендата, Вархеји во понеделник попладне се очекува да пристигне во Србија, во вторник ќе ги посети Босна и Херцеговина, Црна Гора и Северна Македонија, а во среда заминува за Албанија и Косово.
„Патувам за Западен Балкан за да пренесам јасна порака: се грижиме! Се грижиме за нашите партнери и за нивните здравствени работници и за најранливите. Испораката на вакцините ја потврдува нашата посветеност да обезбедиме поддршка, како што тоа го правиме уште од почетокот на пандемијата. Посилни заедно!“
изјави Вархеји.
I will be travelling to #WesternBalkans next week as first #EU-funded #COVID19 vaccines arrive to the region. 651,000 @BioNTech_Group @pfizer vaccine doses will be delivered from May to August to boost vaccination campaigns. We care! https://t.co/ufYDnRtBCc pic.twitter.com/3KObM3D7Qa
— Oliver Varhelyi (@OliverVarhelyi) April 30, 2021
Вакцините од ЕУ се финансирани од пакет вреден 70 милиони евра, усвоен од Европската комисија во декември 2020 година, а со помош на Австрија се дистрибуираат до државите од Западен Балкан. Станува збор за 651 илјада вакцини кои ќе бидат испорачани во регионот од мај до август. Според планот на ЕУ, Северна Македонија треба да добие 119 илјади вакцини.
Босна и Херцеговина ќе има најголем дел, 214 илјади, Албанија 145 илјади, Косово 95 илјади, Црна Гора 42 илјади и Србија, иако е една од државите кои најуспешно ја спроведуваат имунизација, ќе добие 36 илјади вакцини.