Единствениот извор на нови мутации на ковид-19 е телото на заразено лице, затоа масовната вакцинација е важна, бидејќи ќе спречи создавање на нови мутации, вели д-р Вилијам Шафнер, професор на Одделот за инфективни болести Универзитетскиот медицински центар Вандербилт, пренесе Си-ен-ен.
„Невакцинираните луѓе се потенцијални фабрики за нови мутации. Колку повеќе невакцинирани луѓе има, толку се поголеми шансите вирусот да се размножи. Кога тоа ќе се случи, вирусот мутира и може да има уште посериозна мутација на вирусот отколку онаа што е моментално присутна“,
вели Шафнер.
Сите вируси мутираат и, иако коронавирусот не е особено склон кон мутации, тој сепак се менува и еволуира.
Повеќето од овие промени не значат ништо за вирусот, а некои можат да го ослабнат. Сепак, понекогаш вирусот развива случајна мутација која станува позаразна – лесно се шири или реплицира, или може да зарази многу различни домаќини.
„Таквите вируси ќе ги надминат другите вируси и полесно ќе се шират меѓу популацијата. Ако заразено лице го пренесе вирусот на некој друг, мутираната верзија на вирусот ќе се прошири понатаму“,
додава Шафнер.
Ако мутираната верзија стане доволно успешна, таа станува варијанта. Но, за да се случи тоа, вирусот мора да се реплицира, а невакцинираната личност му ја дава таа можност на вирусот.
„Како што се развиваат вирусни мутации, оние кои преживуваат се оние кои можат полесно да се шират меѓу населението“,
вели микробиологот и имунолог Ендру Пекош од школата за јавно здравје на Џонс Хопкинс.
Варијанти на коронавирус го преплавија светот – Б1.1.7 или алфа варијанта, првпат се појави во Англија. Варијантата Н. 1.351 или Бета за прв пат е забележана во Јужна Африка. Делта варијантата, наречена Б. 1.617.2, првпат се појави во Индија. Неколку нови варијанти се појавија и во САД, вклучувајќи ја и варијантата Б. 1.427 која се појави во Калифорнија и Б. 1.526 која се појави во Њујорк.