Филипче уверува дека ќе се обезбедат доволно количини од „Астра Зенека“ за ревакцинација по три месеци од примањето на првата доза. Министерот засега нема да се вакцинира со оваа вакцина, вели дека ќе чека да стигнат поголеми количини
Од среда почнува вакцинацијата со „Астра Зенека“ со која ќе бидат вакцинирани 20 000 граѓани на возраст поголема од 75 години. Министерот за здравство Венко Филипче рече дека во тек е одобрување на вакцината од страна на Агенцијата за лекови, а граѓаните што се пријавиле преку матичните лекари во следните два дена ќе бидат исконтактирани кога и каде ќе се вакцинираат.
Филипче рече дека сега ќе се искористат сите дози од „Астрас Зенека“, а ревакцинација ќе има за три месеци. Рече дека крајот на април се очекува вакцини да стигнат од повеќе места, а ќе има дози за ревакцинација и на македонските граѓани што се вакцинираа во Србија.
Министерот информира и дека за масовна вакцинација се подготвува aрената „Борис Трајковски“ во Скопје, каде што ќе има 30 позиции за вакцинирање против ковид-19, а таму ќе бидат ангажирани лекари и медицински сестри од Здравствениот дом-Скопје.
„Во делот на масовната вакцинација, ќе има голем пункт во спортската сала ‘Борис Трајковски’. Во текот на неделата ќе биде целосно спремен, а вработени лекари сестри од Здравствениот дом ќе ја спроведуваат вакцинацијата тогаш кога ги очекуваме и дополнителните вакцините што ги очекуваме од Кина. Компанијата ‘Фајзер’ конечно го потврди договорот и оваа недела треба да се потпишат договорите со земја членка на ЕУ. Во април очекуваме вакцини од повеќе места за после оваа прва група граѓани над 75 години да бидат повикани на вакцинација и други граѓани… За ‘Астра Зенека’ ја преземаме препораката дека ревакцинација треба да биде за три месеци, веќе имаме најава дека останатите количини до 100 000 треба да стигнат во април. Чекаме и податоци за наши државјани што се вакцинирале, за да се испланира ревакцината да ја примат тука“,
рече Филипче.
Министерот рече дека дека сега нема да се вакцинира со „Астра Зенека“, туку дека ќе чека да стигнат поголеми количини, по што ќе ја прими токму оваа вакцина за, како што рече, да покаже дека нема причина за никакви сомнежи за нејзината безбедност.
„Нема контраиндикација за граѓани од која било возраст да се вакцинираат со оваа вакцина. Сите што се пријавиле ќе бидат повикани од матичниот лекар. Лично јас, сега нема да се вакцинирам, ќе почекам да стигне поголема количина на вакцини, да биде вакцинацијата лесно достапна за сите граѓани, ќе се вакцинирам со ‘Астра Зенека’ за да покажам дека овој сомнеж којшто засега го има само во таа вакцина е апсолутно неоснован. Ги уверувам граѓаните дека сите вакцини го минуваат истиот систем за производство и процес на издавање дозволи“,
рече Филипче.
На прашањето околу обвинувањата дека владини министри се вакцинирале преку ред, Филипче порача дека ако ВМРО-ДПМНЕ не сака да помогне во справувањето со пандемијата не треба ниту да одмага преку ширење лажни вести.
„Ниту еден министер не е вакциниран и тоа одговорно го тврдам. Жал ми е што овие лажни вести потекнуваат од ВМРО-ДПМНЕ покрај сите предизвици што ги имаме. Жалам што се бориме и против лажните вести на ВМРО-ДПМНЕ, не најдоа храброст некако да помогнат. Кога веќе не помогнаа, барем нека не одмагаат“,
рече Филипче.
Филипче посочи дека има силен притисок кон болниците и зголемен број хоспитализирани пациенти со ковид-19, но вели дека нема потреба од вклучување медицински персонал од приватните болници, како и дека засега дека нема потреба од нови рестрикции.