Формиравме група на уставни експерти кои работат на решение коешто ќе биде и уставно, но и во согласност со меѓународните стандарди, така што јас ги уверувам студентите дека како што се изнајдоа многу решенија за многу предизвици и пропусти од минатото така и за ова ќе се изнајде соодветно решение, кажа денеска премиерот Христијан Мицкоски на новинарско прашање за најавениот протест
Со почеток во 12:30 часот, утре во Скопје ќе се одржи протестен марш поради неспроведувањето на Законот за употреба на јазиците при полагањето на правосудниот испит, најави Министерството за внатрешни работи.
Оттаму велат дека протестот ќе започне од плоштадот „Карпошово востание“, а преку Камениот мост ќе заврши пред Министерство за правда. По оваа траса ќе има посебен режим на сообраќај.
На новинарско прашање во врска со најавениот протест, премиерот Христијан Мицкоски денеска го повика студентите да не дозволат да бидат алатка во рацете на една опозициска политичка партија. Тој најави дека група од уставни експерти веќе работат на решение.
„Можам да кажам прво дека овој протест, за жал ,гледам дека е силно поддржан од една опозициска политичка партија, којашто повеќе од 20 години не успеа да го реши тоа прашање и сега е, би рекол, лицемерно на овој начин да комуницира со јавноста. Второ, важно е да кажеме дека студентите своето високо образование го оформиле на својот мајчин јазик – албанскиот. Трето, претходната влада го донесе Законот за јазиците кој е предизвикан пред Уставниот суд, токму оној дел кој се однесува на правосудството. Четврто, имаме негативно мислење на Венецијанската комисија, којашто вели дека треба да се напушти двојазичноста во правосудството бидејќи има предизвици најчесто поврзани со владеење на правото и петто, ние како влада формиравме група на уставни експерти кои работат на решение коешто ќе биде и уставно, но и во согласност со меѓународните стандарди, така што јас ги уверувам студентите дека како што се изнајдоа многу решенија за многу предизвици и пропусти од минатото, така и за ова ќе се изнајде соодветно решение. Јас мислам дека тие тоа веќе го знаат и мојот апел е да не дозволат да бидат алатка во рацете на политичка партија која уште живее во времето на минатиот век“,
рече Мицкоски денеска.