Од Министерството за здравство најавуваат дека набавката ќе се одвива во неколку фази, а во рамките на првата фаза, се очекува во текот на утрешниот ден да биде донесена одлука за обезбедување средства за лекот „трикафта“ за 30 пациенти со цистична фиброза
Министерот за здравство Беким Сали со објава преку својот фејсбук-профил информира дека се очекува во текот на утрешниот ден да биде донесена одлука за обезбедување средства за лекот „трикафта“ за 30 пациенти со цистична фиброза.
„На вчерашната владина седница иницирав обезбедување финансиски средства за лекот „трикафта“ за 30 пациенти со цистична фиброза. Се очекува во текот на утрешниот ден да биде донесена одлука за обезбедување средства. Продолжуваме да се грижиме за здравјето на сите пациенти“,
напиша министерот Сали.
Од Министерството за здравство најавуваат дека набавката ќе се одвива во неколку фази, а во рамките на првата фаза, се очекува во текот на утрешниот ден да биде донесена одлука за обезбедување средства за лекот „трикафта“ за 30 пациенти со цистична фиброза.
Најавите од министерот Сали доаѓаат по вчерашното задолжување кое Владата им го даде на неколку институции за набавка на лекови за пациентите со цистична фиброза.
Од Владата информираа дека е заклучено Министерството за финансии, Министерството за здравство и Фондот за здравствено осигурување да одржат координативен состанок и да достават предлог-решение.
За сабота, пак, Асоцијацијата за цистична фиброза преку Фејсбук најави нов протест од 12 часот пред Владата, со кој повторно ќе побараат да се обезбеди терапија за болните од цистична фиброза.
Во повикот за протест од Асоцијацијата за цистична фиброза велат дека имаат една и единствена цел, а тоа е да ги остварат своите права.
„Право на модулаторна терапија за сите пациенти со цистична фиброза. На Клиниката за пулмологија и Клиниката за детски болести да се создадат услови за лекување на пациентите според протоколите за лекување на оваа состојба со формирање стручни тимови и соодветни и стандардизирани услови за хоспитализација. Фондот за здравствено осигурување да обезбеди медицински помагала кои се неопходни за секој пациент во секојдневната терапија, како што се инхалатори со висок степен на дифузност, пеп/флатер за физикална терапија“,
се правата кои ги бараат од Асоцијацијата за цистична фиброза.
Асоцијацијата и на крајот на декември одржа протест пред Министерството за здравство од каде што побараа да се обезбеди новата терапија за болните, но и алармираа за проблемите со доцнењето на постојната терапија, како и проблемите со хоспитализацијата на овие лица.
Премиерот Димитар Ковачевски рече дека веќе разговарал со министерот за здравство и со директорите на Пулмологија и на Детската клиника и дека се работи за лек којшто во моментов е со исклучително висока цена.
Според него, се работи за лекови кај кои една терапија за еден пациент чини 300.000 евра, односно за сите пациенти годишната терапија би чинела околу 25 милиони евра.
Ковачевски не ја исклучува можноста и за законски измени за набавка на овој лек.