Исклучоци за време на штрајкот ќе има за товарните возила доколку се пренесуваат пратки коишто поради чувствителноста мора веднаш да бидат пренесени, а за автомобилите доколку станува збор за пациенти кои итно заминуваат на лекување
Утре и задутре ќе биде во прекин сообраќајот на граничните премини од Грција кон соседните земји, меѓу кои и кон Северна Македонија. Прекинот, кој ќе почне утре во шест часот наутро, ќе биде поради најавен штрајк на Федерацијата на царински службеници на Грција.
За време на дводневниот штрајк на цариниците се очекува целосно да биде во прекин сообраќајот на граничните премини од и кон Грција за товарните возила и секаков вид пратки, а истото ќе важи и за автомобилите.
Границата единствено дозволено ќе биде да се помине пеш, иако не е исклучена можноста во случај да се создадат колони автомобили да има повремено пропуштање, меѓутоа чекањето би било со часови.
Исто така, велат дека исклучоци ќе има за товарните возила доколку се пренесуваат пратки коишто поради чувствителноста мора веднаш да бидат пренесени, а за автомобилите доколку станува збор за пациенти кои итно заминуваат на лекување.
За штрајкот на грчките царински службеници пред два дена на официјалната фејсбук-страница соопштија и од грчката амбасада во Скопје.
„Федерацијата на царинските работници на Грција најави 48-часовен штрајк во сите царински испостави во земјата на 2 и 3 април 2024 година и ги повикаа сите заинтересирани страни да се погрижат да бидат навреме информирани за работата на секоја царинска испостава, пред нивното пристигнување на граничниот премин“,
се наведува во објавата.
Од Федерацијата на царински службеници на Грција соопштија дека цариниците од Независната управа за јавни приходи, како и од Министерството за финансии ќе одржат 48-часовен штрајк, а од Синдикатот на вработени во јавниот сектор преку соопштение изразија поддршка за штрајкот.