„Предвиденото мора да се спроведе. Во спротивно, нема да има исполнување на европскиот консензус и заклучоците на Советот. Додека тоа не биде реализирано, нема отворање на првиот кластер, кој се однесува на човековите права. Уставните измени, кога ќе се случат, ќе го отворат патот и процесот ќе започне. Природно е тој процес да се одвива врз основа на заслуги. Земјата кандидат мора да ги исполни условите поставени од Унијата. Во ова нема ништо билатерално ниту отворено меѓудржавно прашање. Напротив, ова е јасно дефиниран процес на пристапување“, вели Георг Георгиев, бугарскиот министер за надворешни работи
Впишувањето на Бугарите во Уставот е прв, но не и единствен услов за почеток на преговорите на С Македонија за членство во Европската Унија, оти тоа не е билатералност, туку спроведување на европскиот консензус, вели шефот на бугарската дипломатија Георг Георгиев.
Ова Георгиев го изјави во емисијата „Брисел 1“ на бугарската телевизија „БГ он ер“, посочувајќи ја бугарската позиција по прашањето на интеграцискиот процес на земјава.
„Многу е важно да се знае дека промената на Уставот и впишувањето на Бугарите како државотворен народ не е единствен услов. Односно, не е добро да се испушта во целиот тој разговор, со евентуална цел, за која се надевам дека не е така, ако впишувањето се случи и се исполни условот за уставни измени согласно европскиот консензус, некој да рече ‘ете, ви кажавме дека Бугарите немаат предвид само едно нешто‘. Прво не се само Бугарите, туку и Европска Унија стои зад тој консензус. Тоа е значаен услов што треба да се повторува“,
вели Георгиев.
Потоа, додава Георгиев, во европскиот консензус јасно се напоменати и протоколите, патоказот за заедниците и малцинствата и почитувањето на Договорот за добрососедство.
„Сето ова мора да се реализира. Во спротивно, нема да има исполнување на европскиот консензус и заклучоците на Советот. Додека тоа не биде реализирано, нема отворање на првиот кластер, кој се однесува на човековите права. Уставните измени, кога ќе се случат, ќе го отворат патот и процесот ќе започне. Природно е тој процес да се одвива врз основа на заслуги. Земјата кандидат мора да ги исполни условите поставени од Унијата. Во ова нема ништо билатерално ниту отворено меѓудржавно прашање. Напротив, ова е јасно дефиниран процес на пристапување“,
вели шефот на бугарската дипломатија.
На новинарската забелешка дека во Скопје овие услови не се целосно презентирани, односно македонските политичари ги претставуваат уставните измени како единствено, а не како прво барање во процесот, Георгиев посочи дека тој постојано го повторува истото.
„Редовно, сосема добронамерно им посочувам на колегите. Навистина не сакам да верувам дека тоа се прави намерно или со некоја скриена цел. Напротив, постојат јасно поставени услови, напишани црно на бело низ кои мора процесот да помине“,
кажа тој.
Георгиев посочи и дека позицијата на Софија е кристално јасна и дека нема да го промени својот став, оти има нешто што ќе го побие европскиот консензус во 2022 година за интеграција на Западен во ЕУ, зад кој, додаде, стои целата ЕУ.
Министерот за надворешни работи и надворешна трговија Тимчо Муцунски пред два дена на маргините на состанокот на Советот за надворешни работи на Европската Унија, кој се одржува во Луксембург, оствари средба со комесарката за проширување на Европската унија, Марта Кос.
На средбата се разговарало за актуелниот статус на македонското ЕУ-досие, заемната посветеност за надминување на актуелните предизвици и неопходноста од забрзување на евроинтегративниот процес.