Од собраниска говорница, премиерот рече дека последните информации се дека одлуката е донесена и потпишана од страна на судијката, која и ја иницираше постапката, со што пензионерите веќе нема да добиваат линеарно зголемување на пензиите, туку согласно процентите утврдени со Законот што претходно важеше
Уставниот суд веќе донел одлука за укинување на законската одредба за линеарно зголемување на пензиите и веќе од наредниот месец најголемиот број од пензионерите ќе добиваат помали пензии. Ова денеска од собраниска говорница го рече премиерот Христијан Мицкоски, одговарајќи на пратеничко прашање поставено од пратеникот на ВМРО-ДПМНЕ, Бојан Стојановски.
Покрај тоа, премиерот рече и дека Уставниот суд ќе ја укине и одредбата за платите на судиите и обвинителите, со што нивните примања енормно ќе се покачат.
Според Мицкоски, одлуката за укинување на линеарното зголемување на пензиите на пензионерите веќе е потпишана од страна уставната судијка Добрила Кацарска, која пред Уставниот суд ја иницираше оваа постапка, за оцена на уставноста на последните законски измени со кои пензионерите добија по илјада денари линеарно зголемување во септември, а исто толку треба и во март идната година.
Мицкоски од собраниската говорница ја нарече судијката Кацарска како архетип на неправдата во судството, но не спомнувајќи го директно нејзиното име.
„Точно е дека е покрената постапка пред Уставниот суд и точно е дека таа судијка за која сите зборуваме и која е архетип на неправдата во судството, заедно со една друга обвинителка, што беше вториот столб на тој архетип на судството едно време, и која соучествуваше во онаа чанта од брендот ‘Луј Витон‘, се тие на кои денес им пречи линеарното зголемување на пензиите на пензионерите“,
рече тој.
Посочи дека според последните информации со кои располага, судијката на Уставниот суд ја има потпишано одлуката за укинување на линеарното зголемување на пензиите.
„Последните информации се дека одлуката е донесена, дека е потпишана од нејзина страна и дека пензионерите веќе нема да добиваат линеарно зголемување на пензиите, туку согласно процентите утврдени со Законот што претходно важеше“,
кажа премиерот.
Поради оваа иницијатива, на оваа судијка што е дел од Уставниот суд, според него, тоа подразбира дека 70 отсто од пензионерите ќе добиваат помала пензија од следниот месец.
Според него, ваквата одлука не е фер, бидејќи Уставниот суд ја укинува одлуката, а додаде дека нема да се зачуди доколку истата судијка во Уставниот суд донесе одлука за одмрзнување на платите на судиите и обвинителите.
„Од аспект на фискален товар, помалку пари ќе даде Буџетот. Но, од аспект дали е тоа фер, не е фер, затоа што во време на транзиција кога малкумина олигарси го приватизираа и разграбаа македонското стопанство или поголем дел го уништија, најголем дел од овие пензионери со ниски примања, од 8 000, 9 000, 10 000 или 12 000 денари се резултат на тој процес во тоа време. И затоа тие добиваат така ниски пензии“,
вели премиерот.
Целта линеарното зголемување, како што рече, е да се намали ХД-индексот, а да се зголеми стандардот на пензионерите и на тој начин да се намали степенот на сиромаштија, бидејќи тоа е еден од оние фактори што дефинираат каква е државата.
Веројатно, додаде дека следната одлука што ќе дојде од овој суд е да се одмрзнат платите на судиите и обвинителите.
„Значи на пензионерите им се укинува правото, но затоа на овие судии и обвинители, што се незадоволни со 2 500, 3 000, 4 000 евра ќе треба да им се одмрзнат платите. Пензионерите со 10 000 денари што треба да добијат 1 000 денари зголемување овој месец, тие се побогати од овие малкумина судии што ја контаминираат оваа професија“,
рече Мицкоски.
Според него, дојдено е времето работите да се земат во свои раце, а најави дека како Влада ќе се потрудат овие работи многу скоро да дојдат на свое место, посочувајќи го судството и обвинителството.
Според него, ваквата одлука на Уставниот суд е неправда за пензионерите.
„Ги слушам тие пораки и ќе почнеме да дејствуваме“,
кажа тој.
На седницата за пратенички прашања, поранешната министерка за труд и социјала, и актуелна пратеничка од опозициската СДСМ, Јованка Тренчевска, алармираше дека состојбата со Фондот за пензиско е загрижувачка.
Уставниот суд на 20 ноември соопшти дека поведе постапка за член 2 од Законот за изменување и дополнување на Законот за пензиското и инвалидско осигурување, кој се однесува на линеарното зголемување на пензиите, со кое редовното месечно усогласување врз основа на порастот на платите и трошоците за живот се заменува со еднаква распределба на средствата за сите пензионери, без разлика на висината на пензијата, стажот или уплатениот придонес.