Претседателот на Уставниот суд Дарко Костадиновски, објаснувајќи ја одлуката на судот, во изјава за медиумите посочи дека со овие членови биле направени повреди и од материјална и од формална природа
Уставниот суд на денешната седница, со мнозинство гласови, ги укина членовите 17 и 18 од Законот за изменување и дополнување на Изборниот законик со кои се крена прагот за собирање потписи за независните кандидати и листи што планираат да учествуваат на избори.
Овие измени предвидуваа, наместо 1 000 потписи, независните кандидати и листи, за да се најдат на гласачко ливче, да соберат потписи од еден отсто од вкупниот број гласачи запишани во конкретната изборна единица (ако станува збор за парламентарни избори) или општина (ако станува збор за локални избори).
Претседателот на Уставниот суд Дарко Костадиновски, објаснувајќи ја одлуката на судот, во изјава за медиумите посочи дека со овие членови биле направени повреди и од материјална и од формална природа.
„Нашите сомнежи за материјалната и формалната повреда на законските одредби се потврди. Во поглед на материјалните, станува збор за повреда на политичкиот плурализам кој претставува темелна вредност на нашиот уставен поредок. Општо познато е дека политичкиот плурализам создава позитивни обврски за државата, што значи државата да овозможи ефективно изразување и подеднакви услови на изразувањето на политичката мисла од било кого, не само за политичките партии. Да обезбеди еднакви и фер услови за политички натпревар, што за жал со укинатите одредби, не било сторено. Се повредува и пасивното право на граѓаните и избирачкото право на граѓаните“,
рече Костадиновски.
Во поглед на формалната страна, Судот оценил дека измените на Изборниот законик не се технички, туку станува збор за суштински измени.
„Станува збор за промена на условот под кој граѓаните како изборни субјекти може да предлагаат кандидатски листи за учество на изборите и последиците од таквите измени ги засегаа директно правата на граѓаните. Сето ова наместо да се направи на еден неопходен и нужен демократски начин, направено е по скратена постапка, сосема нетранспарентно, без јавна расправа дури и без дискусија и тоа непосредно пред одржувањето на изборите, со што кај Уставниот суд се појави впечаток дека овие измени се направени во суштина за политичките партии, со единствена цел да се намали бројот на независните кандидати, на самиот број на изборната трка“,
изјави Костадиновски.
На прашањето дали може да се доведат во прашање претходните избори, претседателот на Уставниот суд изјави дека не може да се констатира такво нешто, бидејќи оваа одлука има про футуро дејство, таа е укинувачка, а не е поништувачка, односно, важи од денот кога ќе биде објавена во Службен весник па натаму.
На прашањето, што доколку Собранието не го регулира ова прашање, Костадиновски изјави:
„Веќе кажав, тоа е тешка повреда на човековите слободи и права и тешка повреда на политичкиот плурализам. Во овој момент нема правно правило во кои услови независните граѓани ќе учествуваат. Собранието е должно веднаш да пристапи во уредување на оваа состојба и притоа веднаш да ги земе во предвид сите наши стојалишта“.