Пресудата е донесена врз основа на признание на вина од страна на обвинетиот Реџеп Нуредини, кого обвинителството го товари за насилство, казниво според КЗ. Условната казна нема да се реализира ако тој не стори друго кривично дело во следните пет години
Основниот кривичен суд Скопје денеска му досуди условна затворска казна од две години на Реџеп Нуредини – еден од двајцата напаѓачи на градоначалничката на Град Скопје, Данела Арсовска, за инцидентот од јули годинава кога таа беше физички и вербално нападната за време на обиколка на дивоградби во скопски Чаир.
Условната казна затвор нема да се реализира ако тој не стори друго кривично дело во следните пет години.
Пресудата е донесена врз основа на признание на вина од страна на обвинетиот Нуредини, кого обвинителството го товари за насилство, казниво според член 386, став 1 од Кривичниот законик.
„Обвинетиот денеска на главна расправа покажа искрено каење за стореното, за неговото грубо однесување кон оштетената. Меѓутоа, и самата градоначалничка покажа доблест да му прости за стореното на обвинетиот, дури и не се приклучи кон кривичниот прогон, ниту пак најави имотно-правно побарување, што помогна за изречената максимална алтернативна казна во случајот. Во случајот постојат навистина олеснителни околности, не само извинувањето, каењето за стореното од страна на обвинетиот, меѓутоа и ветувањето дека ќе се чува од такви испади во иднина. Очигледен беше неговиот придонес за ефикасно завршување на оваа кривична постапка“,
изјави адвокатот Насер Рауфи, бранител на обвинетиот Реџеп Нуредини.
На почетокот на септември годинава скопскиот кривичен суд му изрече казна затвор од две години на првообвинетиот за нападот врз Арсовска, Сулејман Љамалари. На рочиштата пред изрекувањето на пресудата, тој цврсто ги негираше обвинувањата дека ја нападнал Арсовска и рече оти тој во случајот не бил напаѓач, туку жртва.