Активен е пожарот во делот од Топлица кон селото Крстец во Прилепско и тоа во тешко пристапен терен, информираат од Центарот за управување со кризи (ЦУК). Намален е интензитетот на пожарот во Катланово, а целосно е локализиран оној кај месноста Бејаз Тепе во Пехчевско. На терен се и екипите од Словенија и Австрија.
Од ЦУК посочија дека пожарот кој почна на 2 август кај Бeјаз Тепе е локализиран. На терен се сто припадници на Армијата, екипа од Бугарија со пет противпожарни возила (PP) и 37 пожарникари, екипа на шумско стопанство (ШС) „Равна Река“ со две теренски возила со цистерни, четири возила за превоз и 30 вработени, екипа на ШС „Малешево“ со четири теренски возила со цистерни, шест теренски возила за превоз и 45 вработени, територијална противпожарна единица (ТППЕ) Берово со три ПП возила и седум пожарникари, Дирекцијата за заштита и спасување (ДЗС) со теренско возило со цистерна и пет вработени, РЦУК Берово со двајца вработени и 40 луѓе од месното население. На терен е и екипата од Словенија, како и екипата од Австрија.
Пожарот во атарот на селото Будинарци е ставен под контрола и е локализиран. Екипите работат на негово расчистување. На пожарот кај Раовиќ – Буковиќ, каде на неутврдена површина гори мешана шума, во текот на вчерашниот ден е дејствувано воздушно – авионски во три-четири наврати. Од земја е интервенирано со 20 војници на Армијата и 20 припадници на ДЗС.
Од Ловиштето Јасен известуваат дека пожарот од Раовиќ се префрлил на територијата на Ловиштето Јасен. На дежурство во селото Раовиќ биле испретени две ПП возила со пет пожарникари. Истата екипа кракот од пожарот кој се спуштал кон селото во 2 часот го изгаснала. Другите краци на пожарот сè уште горат.
На пожарот кај Катланово, односно Дивље и Крушје, од земја е дејствувано со 10 вработени и од страна на БППЗ со една екипа, едно ПП возило, четири пожарникари и 20 припадници на Армијата. Фронтот на пожарот е насочен кон селото Средно Коњаре. Интензитетот на горење моментално е намален, но состојбата може наеднаш да се промени.
Пожарот во атарот на селата Топлица, Ракле и Никодин е сè уште активен во делот од Топлица кон село Крстец во тешко пристапен терен. Во текот на вчерашниот ден интервенирале шест работници од ЈП Национални Шуми – „Црн Бор“ – Прилеп. Во текот на денот немало поддршка за гасење со воздухоплови. ТППЕ Прилеп извести дека не испратиле екипа на овој пожар во текот на денот.