Минатиот месец, Европската комисија го потпиша својот осми договор за вакцина против ковид-19 со „Валнева“, според кој компанијата треба да испорача до 60 милиони дози од вакцината во текот на две години
Европската агенција за лекови денеска соопшти дека започнала евалуација на вакцината против ковид-19 на француската биотехнолошка компанија „Валнева“, неколку недели откако ЕУ потпиша договор со оваа компанија за испорака на вакцината.
Одлуката да се започне со анализа во реално време се заснова на прелиминарни студии кои сугерираат дека вакцината VLA2001 предизвикува одговор на антитела на коронавирусот, се вели во соопштението на Европската агенција за лекови (ЕМА), пренесува Ројтерс.
Вакцината „Синовак“ , како и француско-британската „Sanofi / GlaxoSmithKline (GSK)“ и на рускиот институт Гамалеја, исто така се под ревизија од страна на ЕМА, која има за цел да ги забрза можните одобрувања со проучување на податоците веднаш штом тие се достапни.
Минатиот месец, Европската комисија го потпиша својот осми договор за вакцина против ковид-19 со „Валнева“, според кој компанијата треба да испорача до 60 милиони дози од вакцината во текот на две години.
„Валнева“ во октомври рече дека нејзината вакцина покажала ефикасност „барем еднакво добра, ако не и подобра“ од „Астра зенека“, во студијата во доцната фаза во која вакцините се следеа паралелно, при што вакцината на „Валнева“ има значително помалку несакани ефекти.