Максималната температура денеска ќе се движи од 28 до 41 степен, утре и во понеделник од 30 до 38 степени, додека во вторник од 32 до 40, во среда од 33 до 41 и во четврток од 33 до 42 степени
Гевгелија и Демир Капија денеска ќе бидат градовите каде, според прогнозата на УХМР, температурата ќе биде над 40 степени. Метеролозите најавуваат топлото време да продолжи и денеска во земјава, а од утре се очекува мало намалување до 38 степени. Но тоа ќе трае кратко, бидејќи од четврток повторно се враќаат натпросечните температури кои ќе достигнат и 42 степени.
Максималната температура денеска ќе се движи од 28 до 41 степен, утре и во понеделник од 30 до 38 степени, додека во вторник од 32 до 40, во среда од 33 до 41 и во четврток од 33 до 42 степени.
Поради топлото време надлежните апелираат да се почитуваат општите мерки за заштита од здравјето, да се ослободат од работните обврски најранливите групи, вклучувајќи ги бремените жени, како и лицата на возраст над 60 години, децата од градинките да не се изнесуваат на отворено од 11 до 17 часот.
Се препорачува останување повеќе во затворени простории, а при неопходен престој на отворен простор, да се најде можност за почести одмори под сенка, да се носи светла и лесна облека, а при директна изложеност на сонце да се носат заштитни очила и капа и да се користи крема со висок заштитен фактор, да се внесува помало количество храна, претежно овошје и зеленчук, а помалку масна храна, да се внесуваат големи количества течности, најдобро обична вода за пиење, а да се избегнуваат алкохолните пијалаци. При влегување во возило, потребно е тоа одреден период да се проветри.
Поради високите температури и зголемената можност за појава на труења со храна и цревни заразни заболувања, се препорачува задолжително миење на земјоделско-градинарски производи (свеж зеленчук и овошје) пред нивна употреба, термичка подготовка на храната и нејзино консумирање веднаш по подготовката