Утре на полноќ завршува дваесетдневната изборна кампања, по што почнува изборниот молк што ќе трае до завршувањето на гласањето, в недела во 19 часот
В недела, на 11 јануари, во четири општини во земјава – Гостивар, Марвото и Ростуше, Врапчиште и Центар Жупа ќе се одржат повторени избори за градоначалник.
Утре на полноќ завршува дваесетдневната изборна кампања, по што почнува изборниот молк што ќе трае до завршување на гласањето, в недела во 19 часот.
Од Државната изборна комисија (ДИК) велат дека гласачките ливчиња веќе се печатат и утре заедно со апаратите за биометриска идентификација ќе се дистрибуираат до Општинските изборни комисии, а оттаму ќе бидат подигнати од Избирачките одбори. В сабота гласаат болните и изнемоштените и лицата во затворите.
Од ДИК посочуваат дека од организациски и од технички аспект сè е подготвено за повторените избори.
Во три општини има по двајца кандидати за градоначалници, а во една општина има еден кандидат.
Кандидати за градоначалник на Гостивар се Невзат Бејта од коалицијата ВЛЕН и Ваљбон Лимани од „Националната алијанса за интеграција“ (НАИ).
Во Врапчиште кандидати за градоначалник се Исен Шабани од НАИ и Зулхајрат Демири, поддржан од Група избирачи.
Во Центар Жупа има само еден кандидат за градоначалник – Аријан Ибраим од Демократската партија на Турците.
Во Маврово и Рустуше се двајца кандидати, и тоа Онер Јакупоски поддржан од коалицијата „Твоја Македонија“, предводена од ВМРО-ДПМНЕ, и Анес Ахмети од Социјалдемократскиот сојуз (СДСМ).
Под реден број 1 на гласачкото ливче ќе бидат кандидатите од коалицијата ВЛЕН, а по нив следуваат од „Твоја Македонија“ предводена од ВМРО-ДПМНЕ. Трети на ливчето ќе бидат кандидатите од „Националната алијанса за интеграција“ (НАИ), предводена од Демократската унија за интеграција (ДУИ), а четврта ќе биде коалицијата на СДСМ. Група избирачи – подносител Зулхајрат Демири се под број пет, а шестката се Демократската партија на Турците во Македонија.
Избирачкиот список за повтореното гласање е веќе заклучен. Во Гостивар во Избирачкиот список се запишани 82 870 граѓани со право на глас, за Маврово Ростуше се запишани 10 575, во Врапчиште има 27 279, а бројот на гласачи во Центар Жупа запишани во Избирачкиот список се 7 562.
Според информациите од ДИК, нема никаков интерес за набљудување на повторените избори и до денеска нема пријавено ниту еден набљудувач.
Во Регистарот за медиуми за платено политичко рекламирање пријавени се 32 интернет портали, 13 регионални и национални телевизии и пет радиостаници.
Според изборниот законик, за изборите да бидат успешни, треба да излезат најмалку една третина од гласачите или 33,33 отсто.
Изборите за градоначалник во овие четири општини се повторуваат поради недоволен цензус, односно поради недоволниот одзив на гласачи во првиот круг од локалните избори 2025.
Во Гостивар одзивот беше 33,31 отсто, во Врапчиште – 25,18 отсто, во Маврово и Ростуше – 30,31 отсто и во Центар Жупа – 21,49 отсто.