Украинскиот авион „боинг 737“, кој денеска се урна во Иран, беше нов и два дена пред несреќата ја помина последната техничка контрола, објави украинската авиокомпанија УИА.
„Авионот е произведен во 2016 година, а компанијата го презеде директно од фабрика. Авионот го помина последното редовно техничко одржување на 6 јануари 2020 година“,
објави УИА на Фејсбук.
Во несреќата нема преживеани. Вкупниот број на загинати е 176, од кои 9 члена на екипажот, а 167 се патници.
Авионот полета од Техеран во шест часот и 10 минути по локално време од Техеран за Киев, а две минути потоа исчезна од радарите и се урна помеѓу градовите Паранд и Шахриар.
Според првичните информации од иранските власти и од Амбасадата на Украина во Техеран, авионот се урнал поради дефект на моторот. Но, подоцна Амбасадата на Украина во Иран го замени соопштението за причините за падот на авионот во Техеран, во кое се исклучуваше терористички или ракетен напад како причина за несреќата.
Во новото соопштение Амбасадата наведува дека причините за инцидентот се разјаснуваат, како и дека претходното соопштение за причините за несреќата не е официјално.
„Информациите за причините за несреќата на авионот ги појаснува комисија. Секое соопштение во врска со причините за несреќата пред одлуката на комисијата не е официјално“,
се истакнува во соопштението.
Авионот се урна само неколку часа откако Иран изврши ракетен напад врз две бази во Ирак каде што се сместени американските сили, во знак на одмазда за убиството на иранскиот генерал Касим Сулајмани.
Две црни кутии се пронајдени на местото на несреќата, но директорот на Иранската организација за цивилно воздухопловство Али Абеџедех изјави дека тие нема да му бидат предадени на производителот на авиони „Боинг“.
Несреќата се случува неколку дена пред и официјално да дојде до промените во врвот на компанијата откако во декември 2019 беше променет извршниот директор поради катастрофалната година која ја остава зад себе „Боинг“, односно откако во две несреќи загинаа 346 лица.