Ќе се протестира во сите институции каде што Синдикатот на УПОЗ има синдикални организации како што се министерства, агенции, фондови, управи и судови, со барање за исплата на минимална плата и линеарно зголемување на платите на сите вработени за 2 806 денари
Вработените во управата и правосудството во четврток и петок ќе имаат двочасовен бојкот на работата, од 10 до 12 часот, барајќи исплата на минимална плата и линеарно зголемување на платите на сите вработени за 2 806 денари, најави денеска Трпе Деаноски, претседателот на Синдикатот на работници од управата, правосудните органи и здруженија на граѓани (УПОЗ).
Ќе се протестира во сите институции каде Синдикатот на УПОЗ има синдикални организации како што се министерства, агенции, фондови, управи и судови.
„Ќе има прекин на работата. Известени се и Владата и министерства, сите работодавачи. Ги замолувам граѓаните на трпение, не е многу, два часа се, меѓутоа тие два часа можат да пораснат и да бидат осум часа прекин“,
рече претседателот на Синдикатот на УПОЗ, Трпе Деаноски, на денешната прес-конференција.
Како што посочи Деаноски, во 95 проценти од институциите се исплаќа плата под минималната, а во останатите пет проценти, дел не ја подготвуваат платата, а оние што веќе ја исплатиле, направиле грешки и исплатиле само минимална плата без стаж.
Досега, од Владата не добиле покана за преговори по однос на ова прашање, а притисокот од членството, како што посочија, е голем и се бара прекинот на работата да продолжи.
„Се надеваме дека Владата и надлежните ќе имаат барем малку сенс и ќе направат напори овој период да разговараме и да најдеме начини за решавање на нашите барања, но изгледа дека Владата не е заинтересирана за преговори со нас, иако тоа го вети. Она за што предупредувавме минатиот пат се оствари и скоро во сите институции во управата и правосудството на вработените не им се исплаќа минимална плата. Повторно вработените од управата и правосудството остануваат единствените во државата со плата под минималната плата“,
рече Деаноски.
Како за пример дека институциите не го почитуваат Законот за минимална плата, од УПОЗ го посочуваат примерот со објавениот оглас од Министерството за финансии за референт писар за кое работно место е предвидена плата од 14 909 денари што е пониска не само од важечкиот износ на минимална плата од 18 000 денари, туку и од претходниот износ на минималецот од 15 142 денари.