Интензивирањето на академската соработка е во духот на европските вредности и придонесува за зајакнување на добрососедските односи, се вели во заедничкиот став на двата универзитета
Битолскиот и Софискиот универзитет, кои го носат името на св. Климент Охридски, оваа година заеднички ќе го одбележат патрониот празник, информираат од Универзитетот „Св. Климент Охридски“ во Битола.
Целта е, како што велат, да се придонесе кон зајакнување на добрососедските односи.
„Интензивирањето на академската соработка во пресрет на големиот празник на двата универзитети е во духот на европските вредности и придонесува за зајакнување на добрососедските односи. Празникот за двата универзитета претставува повод и одлична можност до академската јавност да се испратат пораки што ќе значат поттик за интензивирање на меѓусебната соработка. Додека пак зближувањето преку образованието, науката, креирањето позитивна клима и поволен концепт за поголема поврзаност преку размена на знаења, искуства, но и размена на млади, студенти и универзитетски кадри е еден од меѓусебно усогласените приоритети за време на самитот на Берлинскиот процес во Софија на којшто двете земји се во улога на домаќини“,
се вели во заедничкиот став на двата универзитета.
Двајцата ректори, Анастас Герджиков од софискиот и Сашо Коруновски од битолскиот универзитет, ќе имаат заеднички видеообраќања, а на почетокот на декември во Софија ќе се одржи заедничка научна интердисциплинарна конференција на тема „Димензиите на компетенциите“ во која, преку заеднички научен програмски и организациски комитет и со учество на повеќе професори, на крајот ќе резултира со издавање заеднички зборник на трудови.
Активностите во чест на заедничкиот патрон се темелат на потпишаниот Меморандум за меѓусебна соработка и се дел од договорот постигнат во март оваа година.
„Сите овие активности се во функција на зајакнување и унапредување на билатерална соработка: размена на знаења и искуства, заедничка работа во повеќе области од заеднички интерес како што се наставна, научно-истражувачка работа, публицистичка дејност, размена, мобилности на кадри и студенти, организирање гостувачки предавања, заеднички настани, конференции, тркалезни маси и други форуми, престои на визитинг-професори и особено подготовка на проектни апликации и учество во заеднички проекти во рамките на европските и други програми за заедничка академска и научна истражувачка соработка“,
вели проректорот на Универзитетот „Св. Климент Охридски“, Марјан Ѓуровски.