Загубите на наставата не само што имаат тековно негативно влијание врз децата туку ќе влијаат и врз нивниот живот во иднина и идниот економски развој на државата, посочува Канцеларијата на УНИЦЕФ во земјава. Во меѓувреме, власта и опозицијата си ја префрлаат топката околу тоа кој е виновен што наставата во основните и средните училишта во земјава е во прекин веќе трета недела по ред
Економските последици од пропуштеното во учењето ќе влијаат на намалена заработувачка во животот на децата од денешната генерација, а овие загуби не само што имаат тековно негативно влијание врз децата, туку ќе влијаат и врз нивниот живот во иднина и идниот економски развој на државата, стои во писмената реакција од Канцеларијата на УНИЦЕФ во земјава, од каде изразуваат сериозна загриженост поради продолжениот прекин на наставата во училиштата.
Оттаму повикуваат на преземање мерки со кои на децата од основното и средното образование ќе им се овозможи да ја надоместат изгубената настава, веднаш по враќањето во училишните клупи, за да се избегнат долготрајни штети по добросостојбата и продуктивноста на децата, додавајќи дека оваа учебна година учениците во земјава веќе пропуштија две недели настава поради задоцнетиот почеток на учебната година.
„Сега, со пролонгираниот штрајк на наставниците кој влегува во својата трета и евентуално и четврта недела, постои веројатност децата да изгубат до шест недели настава во оваа учебна година и сето тоа во време кога требаше да се надоместува знаењето пропуштено како последица на ковид-19. Сега, повеќе од било кога порано, треба да донесеме мерки за надоместување на пропуштеното знаење и за забрзување на образовната реформа за да може да се одговори на образовната криза којашто му претходеше на ковид-19“,
се наведува во писмената изјава на Канцеларијата на УНИЦЕФ во земјава, од каде што додаваат оти години наназад Северна Македонија се соочува со криза во учењето при што повеќе од половина од учениците на петнаесетгодишна возраст не ги постигнуваат основните нивоа на знаење по читање и математика.
Според УНИЦЕФ, по враќањето во училиштата, најважно е наставниците да го оценат нивото на знаење на учениците и да им обезбедат настава приспособена на потребите и нивото на знаењата, а додаваат и оти треба да се размисли за мерки од типот на продолжување на времетраењето на наставата, организирање часови за надоместување на пропуштеното, приспособување на наставата за да се задоволат конкретните потреби од учење на учениците. На матурантите, пак, како што додаваат од УНИЦЕФ, ќе им треба дополнителна поддршка да го совладаат материјалот за да може непречено да го продолжат своето школување во повисоките нивоа на образование.
Во писменото соопштение, УНИЦЕФ ги повикува сите учесници во социјалниот дијалог пред сè да го имаат предвид најдобриот интерес за детето.
Во меѓувреме, власта и опозицијата си ја префрлаат топката околу тоа кој е виновен што наставата во основните и средните училишта во земјава е во прекин веќе трета недела по ред.
Од владејачкиот СДСМ велат оти ВМРО-ДПМНЕ стои зад политизацијата на штрајкот на Синдикатот за образование, наука и култура (СОНК), кој е на штета на децата, на родителите и наставниците.
„Тоа е истата ВМРО-ДПМНЕ која го урниса образованието, во чие време на владеење, наставниците беа понижувани, уценувани и под постојан притисок. ВМРО-ДПМНЕ преку своите пратеници со месеци го блокира Законот за наставници и стручни соработници во основните и средните училишта“,
велат од СДСМ.
Од другата страна, пак, од ВМРО-ДПМНЕ велат оти во целост ја поддржуваат истрајноста на СОНК за покачувањето на платите во образовниот сектор и додаваат оти власта залудно ги користи механизмите за уцени и притисоци.
„Штрајкот на СОНК беше најавуван два месеци пред да се случи. Владата доколку вистински сакаше да најде решение за барањата на просветниот кадар тоа можеше да го направи уште пред почетокот на штрајкот. Така немаше да има прекин во образовниот процес и немаше да биде на штета на децата. Доколку владата навистина сакаше образованието да биде организиран и постојан процес на унапредување, немаше да го претвори во ресор на експерименти“,
реагираат од опозициската ВМРО-ДПМНЕ, додавајќи оти наместо притисоци и закани, власта треба да ги покачи платите на наставниците, а со тоа да стави крај на штрајкот.
Генералниот штрајк на вработените во основните и средните училишта во земјава започна на 11 април, односно веќе трета недела по ред не се одржува настава во училиштата.
Вчера, лидерот на СОНК, Јаким Неделков, извести оти Синдикатот не ја прифаќа понудата на Владата за покачување на платите во образовниот и секторот за детска заштита за 12 проценти и поради тоа штрајкот продолжи и денеска, но само во училиштата. Вработените во градинките, пак, од денеска згрижуваат деца.