Меѓународниот совет на споменици и локалитети, ИКОМОС, бара Охридскиот регион да биде ставен на листата на природни и културни богатство во опасност, додека Бразил ја предводи групата држави кои сметаат дека земјава треба да добие рок од уште една година.
Вака помина вчерашната попладневна сесија на УНЕСКО во Баку, каде прелиминарно стана збор и за С.Македонија која допрва ќе ја знае конечната одлука – ќе влезе ли Охридскиот регион на непопуларната листа или земјата ќе добие последна шанса да ги смени работите.
Од ИКОМОС посочија дека години наназад, државата нема план за управување со регионот. Ако на тоа се надоврзе и масовно градење, впишување на листата би претставувало услуга за Македонија, сметаат тие.
„И индивидуално и колективно ова претставува потенцијална закана за тие исклучителни универзални вредности. Потребни се итни мерки за справување со овие закани и тие мерки треба што е можно поскоро да се спроведат. Со тоа ќе се спречи континуираната ерозија на оваа универзална вредност. Затоа, ставањето на листата како богатство во опасност треба да биде искористено како алатка за поддршка“,
сметаат од ИКОМОС .
Ставот на ИКОМОС го делат и Меѓународната унија за конзервација на природата и една од најгласните европски невладини од оваа сфера, Еуропа Ностра. Предлогот Охридскиот регион да се стави на листата на богатства во опасност ја поддржа и делегацијата на Унгарија.
Против вакво решение е Бразил – земја која смета дека актуелната Влада бавно ги исполнува препораките на УНЕСКО, но сепак бележи напредок, и дека наместо со ставање на листата на загрозени, земјата треба да се мотивира со пролонгирање на рокот.
„Свесни сме дека многу препораки дадени од надзорните тела се’ уште се на чекање, но имајќи го во вид напредокот кој досега е направен, сметаме дека земјата ќе биде дополнително поттикната да ги исполни препораките ако добие уште една година пред локалитетот да биде впишан како светско наследство во опасност.“
се заложи Бразил.
Предлогот на Бразил го поддржа Албанија, со која го делиме езерото, а со ист став настапија и Кина, Босна и Херцеговина, Кувајт, Азербејџан, Австралија и Куба.
Свое излагање имаше и предводникот на македонската делегација, министерот без ресор, Едмонд Адеми. Тој изрази надеж дека рокот ќе биде пролонгиран а како аргумент ги посочи напорите на Владата за заштита на Охридскиот регион преку грижа не само за езерото, туку и за градското јадро и за Националниот парк „Галичица“.
„Владејачката партија цврсто верува дека е способна забележително да ја подобри состојбата на природното и културното наследство во Охридскиот регион, и да ја продолжи работата започната во јули 2017. Во последните две години, новата Влада на Северна Македонија му покажа на светот дека е способна да испорача позитивни резултати, и е целосно посветена и натаму да испорачува резултати и за заштита и афирмација на природното и културното наследство на регионот“, .
посочи Адеми.
Конечната одлука за тоа дали Охридскиот регион ќе биде сместен на листата на богатства во опасност или ќе биде даден нов рок во кој ќе треба да се реализираат итни мерки, се очекува да биде донесена во текот утрешниот ден.