Денеска е „денот Д“ за Охридскиот регион – во Баку ќе се гласа дали ќе биде ставен на црната листа на загрозени богатства на УНЕСКО или сепак ќе ја избегне таквата судбина.
Според информациите на „360 Степени“ земјава најверојатно ќе добие рок од една година за да ја среди ситуацијата за Охрид да го задржи статусот на УНЕСКО добиен во 1979 година. Со други зборови, С. Македонија ќе има рок до јуни догодина да ги спроведе препораките и да демонстрира напредок. Но, надлежните ќе мораат да преземат мерки што е можно побрзо зашто, според сознанијата на „360 Степени“, во февруари се очекува да биде изготвен периодичен извештај за напредок врз основа на кој УНЕСКО ќе се раководи при носењето на конечната одлука.
Владината делегација во Баку презентираше дека Владата активно работи на заштита на овој регион за што побара продолжување на рокот за исполнување на дел од препораките од надзорните тела на УНЕСКО.
На вчерашната сесија, Бразил предложи да биде продолжена временската рамка поради како што беше соопштено, бавниот но забележлив напредок, а предлогот беше поддржан од Албанија, Босна и Херцеговина, Кина, Азеербејџан, Кувајт, Австралија, Унгарија и Куба.