Американскиот Стејт департмент вчера објави дека ситуацијата на бојното поле во Украина е исклучително сериозна бидејќи украинската армија нема доволно муниција за да ја одбие руската агресија
Украинската војска соопшти дека нејзините сили се повлекле од уште две села во близина на градот Авдиивка на истокот за земјата, кој претходно месецов падна под руска контрола по неколкумесечни жестоки борби.
Украина трпи нови загуби на бојното поле поради, како што наведува украинскиот сервис на Радио Слободна Европа (РСЕ), недостиг на опрема, особено муниција. Последните повлекувања на нејзините војници се од селата Степов и Север, кои се наоѓаат западно од Адвиивка, соопшти вчера портпаролот на украинската армија, Дмитро Лихови.
„Нашите сили се повлекоа од малите села Север и Степов… Тешки борби за Север се водеа вчера вечерта и ноќеска“,
рече Лихови додавајќи дека руските сили претрпеле значителни загуби во битката.
Според портпаролот, украинските сили консолидирале нови одбранбени позиции западно од Авдиивка.
Руското Министерство за одбрана, исто така, соопшти дека го зазеле селото Север и дека нивните војници сега држат поповолни борбени линии и позиции. Од Министерството велат дека руските сили ги нападнале украинските во близина на Север и Степов, како и кај населбата Ласточкине, за која Киев вчера објави дека нејзините војници се повлекле од ова место.
Од друга страна, командантот југоисточниот сектор на Украина, Олександр Тарнавски на Телеграм, изјавил дека одбранбената линија во секторот Авдиивка е стабилизирана во три области и дека руските сили биле спречени во обидите да напредуваат во две други области на југ, вклучително и селото Роботин кое е под контрола на Украина.
Сепак, ваквите тврдења, како што пренесуваат агенциите, не можат да се потврдат од независни извори.
Американскиот Стејт департмент вчера објави дека ситуацијата на бојното поле во Украина е исклучително сериозна бидејќи украинската армија нема доволно муниција за да ја одбие руската агресија.
Портпаролот на Стејт департментот, Метју Милер, рече дека украинските војници продолжуваат храбро да се борат со оружјето и муницијата што ги имаат, но „ора да ги чуваат бидејќи американскиот Конгрес не дејствува“
Милер повторно го повика Конгресот да го донесе законот со кој ќе се обезбеди воена помош од 61 милијарда долари за украинската војска.
Претседателот на Претставничкиот дом, Мајк Џонсон, сојузник на поранешниот претседател Доналд Трамп, одби да дозволи гласање за законот.
Американскиот претседател Џо Бајден и високи претставници на демократите вчера во Белата куќа се состанаа со Џонсон и други високи републикански членови на Конгресот за да најдат излез од ќорсокакот на кој наиде законот за помош на Украина.
Во соопштението на Белата куќа објавено по состанокот се наведува дека американскиот претседател разговарал за тоа како Украина го загубила теренот на бојното поле во последните недели и е принудена да ја рационализира муницијата и резервите поради неактивноста на Конгресот.
Бајден повторно предупредил на тешките последици од одложувањето на помошта што Сенатот пред речиси две недели ја одобри со големо мнозинство.
Претседателот на претставничкиот дом по состанокот рече дека пакетот од Сенатот не прави ништо за зголемување на безбедноста на границата меѓу САД и Мексико од илегална миграција, што републиканците го бараат во замена за одобрување на помошта за Украина.