Со возило на Итната медицинска помош од Косово бил пренесен во најблиската болница во Косово, каде што им подлегнал на повредите
Украински државјанин загина на магистралниот пат Скопје – Граничен премин „Долно Блаце“, откако во него удрило возило „фолксваген голф“ со германски регистарски ознаки. Од Министерството за внатрешни работи информираат дека вчера околу 18 часот во СВР Скопје било пријавено дека несреќата се случила на околу 200 метри од граничниот премин.
„Патничко возило ‘фолксваген голф’ со германски национални ознаки, управувано од Б. С.(22) од Косово, со живеалиште во Сојузна Република Германија, удрило во пешакот К. М. (53) од Украина. Во несреќата со тешки телесни повреди се здобил пешакот, кој со возило на Итна медицинска помош од Косово бил пренесен во најблиската болница во Косово, каде што во 20:20 часот им подлегнал на повредите. Лекар констатирал смрт, а по наредба на јавен обвинител телото на починатиот било дадено на обдукција“,
информира МВР.
Според пријавата, со телесни повреди се здобила и 22-годишната Б. С., која управувала со возилото, констатирани во приватна болница во Скопје.
Извршен бил увид од јавен обвинител и увидна екипа на СВР Скопје и се работи на расчистување на случајот, информираат од МВР.