Соединетите Американски Држави и Јужна Кореја го обвинија Пјонгјанг дека ѝ доставува на Русија муниција и проектили за да ја поддржи нејзината инвазија на Украина, која трае од февруари 2022 година
Меѓу сојузниците на Москва, Северна Кореја е најголемиот проблем за Киев поради масивното снабдување на Москва со артилериски гранати што се користат на украинскиот фронт, изјави денеска шефот на украинското разузнавање Кирило Буданов.
„Од сите сојузници на Русија, нашиот најголем проблем е Северна Кореја бидејќи со количината на воена опрема што ја снабдуваат тие навистина влијаат на интензитетот на борбите. Властите на Северна Кореја обезбедуваат огромни количини артилериска муниција и тоа е критично за нас. За жал, не можеме да направиме ништо во врска со тоа во моментов. Непријатно е тоа што испорачуваат и балистички ракети“,
рече тој на конференцијата во Киев.
Соединетите Американски Држави и Јужна Кореја го обвинија Пјонгјанг дека ѝ доставува на Русија муниција и проектили за да ја поддржи нејзината инвазија на Украина, која трае од февруари 2022 година.
Пјонгјанг ги негира обвинувањата, но тинк-тенкот „Conflict Armament Research“ оваа недела соопшти дека анализата на остатоците покажала дека ракетите произведени оваа година во Северна Кореја се користат во Украина.
Буданов смета дека Русија ќе се обиде да стави крај на војната пред 2026 година, со цел да избегне слабеење на нејзините позиции поради акумулацијата на економските проблеми, главно поради западните санкции и проблемите со мобилизацијата поврзани со значителни загуби на фронтот.