Путин вчера најави еднострано примирје од 8 до 11 мај, што ќе се совпадне со годишната Парада на победата на Црвениот плоштад во Москва, со која се одбележува крајот на Втората светска војна, која се одржува во Русија на 9 мај
Портпаролот на Кремљ, Дмитриј Песков, го отфрли предлогот на Киев, едностраното тридневно примирје кое рускиот претседател Владимир Путин го најави за почетокот на мај, да се продолжи на 30 дена.
Москва ја виде понудата од украинскиот претседател Володимир Зеленски, но прво треба да се разјаснат голем број прашања, рече Песков.
„Без одговори на овие прашања, тешко е да се склучи долгорочен прекин на огнот“,
рече тој, додавајќи дека ова е ставот на Путин.
Путин ги изложи условите во март, кога американскиот претседател Доналд Трамп предложи 30-дневен прекин на огнот. Тие вклучуваа забрана за Украина да ја користи паузата за прегрупирање и вооружување на своите сили и забрана за снабдување на Киев со западно оружје. Тој не понуди никакви отстапки за возврат.
Путин вчера најави еднострано примирје од 8 до 11 мај, што ќе се совпадне со годишната Парада на победата на Црвениот плоштад во Москва, со која се одбележува крајот на Втората светска војна, која се одржува во Русија на 9 мај.
Меѓу странските гости што ќе присуствуваат на овогодинешната парада е и кинескиот претседател Си Ѓинпинг.
Песков го опиша објавувањето на тридневниот прекин на огнот како гест на добра волја, додека Зеленски рече дека декларацијата на Путин за прекин на огнот е уште еден обид за манипулација.