Тој додаде дека ја поддржува идејата на претседателот Трамп за трилатерален самит со рускиот претседател Владимир Путин, на кој би се разговарало за завршување на војната
Одговарајќи на новинарските прашања, за време на средбата со својот украински колега, Трамп не ја исклучи можноста од испраќање американски војници во Украина, во контекст на мировни гаранации, но сепак нагласи дека во таа насока Европа би ја имала главната улога
Во Белата куќа вечерва (според средноевропско време) се одржа состанокот меѓу американскиот претседател Доналд Трамп и неговиот украински колега Володимир Зеленески.
По пречекот на Зеленски, двајцата претседатели одговараа на прашања во Овалната соба, каде новинарите се обидоа да извлечат што пококренти одговори околу плановите и иницијативата за Трамп за ставање крај на војната во Украина.
Атмосферата во Овалната соба, како што забележаа повеќето медиуми, на денешниот состанок беше многу поколегијална за разлика од тензиите што ја одбележаа претходната средба на двајцата лидери во февруари годинава.
Додека претседателот Доналд Трамп го пречекуваше украинскиот претседател Володимир Зеленски во Западното крило, еден новинар праша каква е неговата порака до Украинците.
„Ги сакаме“,
рече Трамп пред да влезе во Белата куќа со својот гостин.
Американскиот претседател, одговарајќи на новинарските прашања, уште на почетокот кажа дека е постигнат значителен напредок во неговите напори за ставање крај на конфликтот во Украина на повеќе нивоа, без да сподели поконкренти детали.
Сепак, порача дека верува оти секој договор за мир мора да биде одржлив, додавајќи дека без разлика на исходот од денешните состаноци, американската поддршка за Украина останува.
Можно испраќање американски војници во Украина
Одговарајќи на новинарските прашања, тој не ја исклучи можноста од испраќање американски војници во Украина, во контекст на мировните гаранации, но сепак нагласи дека во таа насока Европа би ја имала главната улога, додека Соединетите Американски Држави би биле вклучени.
„Ќе има многу помош“,
рече тој.
Инаку, американскиот претседател, како што потсетува Си-ен-ен, во четвртокот изјави дека нудењето безбедносни гаранции за Украина сè уште е предмет на дискусија меѓу САД и нивните сојузници во НАТО.
Прашан во врска со барањето на рускиот претседател Владимир Путин да се елиминираат, како што тој ги нарече, „коренитите причини“ за војната, Трамп не даде конкретен одговор додека седеше до Зеленски во Овалната соба.
„Војната ќе заврши кога ќе заврши. Не можам да ви кажам, но војната ќе заврши, а овој господин сака таа да заврши и Владимир Путин сака таа да заврши… Мислам дека целиот свет е уморен од тоа и дека ние ќе го завршиме“,
рече Трамп.
Како ќе се постигне тоа – американскиот претседател не кажа, но извесен нов момент е што му даде помали димензии на неговиот претходен повик за прекин на огнот и наместо тоа навести дека се залага за поширок мировен договор.
„Ми се допаѓа концептот за прекин на огнот од една причина: затоа што би престанало убивaњето луѓе веднаш, наместо за две недели, или една недела, или што и да е потребно. Работиме на мировен договор додека тие се борат, тие мора да се борат. Жалам што не можеа да престанат. Би сакал да престанат, но стратешки, тоа би можело да биде неповолно за едната или другата страна. Исто така, можам стратешки да разберам зошто. Знаете, едната или другата земја не би го сакале тоа. Имате прекин на огнот, и тие градат и градат и градат. И знаете, можеби не го сакаат тоа“,
рече американскиот претседател.
Во таа насока Трамп направи паралела со другите конфликти на кои успеал да им стави крај без претходен договор за прекин на огнот.
Трилатерална средба
Украинскиот претседател рече дека Киев е подготвен да бара дипломатски пат за завршување на војната. Тој ја нагласи важноста од трилатерален состанок со Москва и Вашингтон и потсети дека Украина секојдневно трпи руски напади, вклучувајќи го и последниот смртоносен напад врз Харков.
„Мора да ја запреме оваа војна и потребна ни е поддршка од американските и европските партнери“,
рече Зеленски.
Тој додаде дека ја поддржува идејата на претседателот Трамп за трилатерален самит со рускиот претседател Владимир Путин, на кој би се разговарало за завршување на војната.
Украинскиот претседател изрази благодарност за новата програма на НАТО што им овозможува на земјите членки да купуваат оружје од Соединетите Држави и потоа да го испорачуваат во Украина.
Сепак, нагласи дека на Киев му се потребни системи за воздушна одбрана „Патриот“.
„Благодарни сме за оваа програма и оваа можност. Благодарни сме на Европа – тие плаќаат за ова“,
рече тој.
На прашањето дали Украина е подготвена да ги „прецрта мапите“ при евентуален мировен договор или „ќе продолжи да испраќа украински војници во смрт уште неколку години“, Зеленски не одговори директно, но ги пофали напорите на администрацијата на Трамп да ја запре војната.
„Треба да ја запреме оваа војна, да ја запреме Русија. И ни треба поддршка (од нашите) американски и европски партнери. Ја поддржавме идејата на Соединетите Американски Држави, лично на претседателот Трамп, да ја запре оваа војна, да најде дипломатски начин за завршување на оваа војна“,
додаде тој.
Во однос на одржување на трилатерална средба меѓу Москва, Украина и САД, Трамп рече дека постои разумна шанса за такво нешто, ако денешните разговори се одвиваат добро. „Мислам дека ако сè се одвива добро денес, ќе имаме трилатерална средба и мислам дека ќе има разумна шанса да се заврши војната кога ќе го направиме тоа“, изјави Трамп пред новинарите во Овалната соба.
Прашан од новинар какви бездносни гаранции ѝ се потребни на Украина, што би водело кон мировен договор со Москва, Зеленски рече „сѐ“.
Тој рече дека на Украина прво ѝ е потребна силна армија, што вклучува оружје, луѓе, обука и разузнавање.
Додаде дека сето ова ќе зависи од „големите земји“, како што се САД и другите сојузници.
Путин очекува телефонски повик од Трамп
Американскиот претседател Доналд Трамп рече дека по денешните разговори во Белата куќа со европските лидери и украинскиот претседател Володимир Зеленски, ќе има телефонски разговор со рускиот претседател Владимир Путин.
„Тој го очекува мојот повик кога ќе завршиме со оваа средба“,
рече Трамп.
Тој додаде дека во разговорот со Путин ќе ја презентира идејата за трилатерална средба меѓу него, Путин и Зеленски.
„Можеби ќе имаме трилатерална средба, можеби и не. Ако нема, борбите продолжуваат, а ако има, има добри шанси, мислам дека ако има трилатерална средба, постои голема можност војната да заврши“,
рече Трамп.
Инаку, покрај Зеленски, во Белата куќа денеска пристигнаа и европските лидери кои исто така имаат средба со американскиот претседател.
Прв пристигна генералниот секретар на НАТО, Марк Руте, а по него британскиот премиер Кир Стармер и претседателката на Европската комисија, Урсула фон дер Лајен. Набргу по нив пристигна италијанската премиерка Џорџија Мелони, а по неа и финскиот претседател Александар Стаб и германскиот канцелар Фридрих Мерц. Последен пристигна францускиот претседател Емануел Макрон.
Средбата меѓу Трамп, Зеленски и европските лидери доаѓа по онаа меѓу него и рускиот претседател Владимир Путин во воздухопловната база „Елмендорф-Ричардсон“ во близина на Енкориџ на Алјаска што се одржа минатата недела. Трамп на прес-конференција по средбата со неговиот руски колега рече дека е постигнат „голем напредок“, но призна дека не е постигнат договор за прекин на војната.