Од друга страна, рускиот претседател Владимир Путин претходно вчера, првпат од почетокот на војната, излезе со предлог за билатерални разговори со Украина, кој Зеленски избегна да го коментира директно, но кажа дека Киев е подготвен на каква било дискусија што ќе резултира со запирање на нападите врз цивилни цели
Украина чека јасен одговор од Русија дали ќе го прифати предлогот за прекин на огнот врз цивилни цели. Ова во синоќешното видеообраќање го кажа украинскиот претседател Володимир Зеленски и нагласи дека Киев останува на предлогот и оти е подготвен на каква било форма на разговор за да се постигне тоа.
„Украина стои на својата понуда. И очекуваме јасен одговор од Москва. Отворени сме за секаков вид разговори за да го обезбедиме тоа“,
рече Зеленски, пренесуваат светските агенции.
Од друга страна, рускиот претседател Владимир Путин претходно вчера, првпат од почетокот на војната, излезе со предлог за билатерални разговори со Украина.
Зеленски не го коментираше директно предлогот на Путин, но кажа дека Киев е подготвен на каква било дискусија што ќе резултира со запирање на нападите врз цивилни цели.
„Постои очигледен, наједноставен и најсигурен начин да се запрат ракетните напади и нападите со беспилотни летала со долг дострел… Самото тоа автоматски би ја осигурело безбедноста на целата цивилна инфраструктура“,
рече украинскиот претседател, пренесува регионалниот сервис на РСЕ.
Тој потврди дека Украина ќе учествува на разговорите со САД и европските земји што треба да се одржат утре (23 април) во Лондон, кои ги оцени како почетна точка на заложбите за безусловен прекин на огнот.
Инаку, по прекинот на огнот за Велигден, што во саботата еднострано го објави рускиот претседател, борбите меѓу завојуваните страни продолжија.
Украинските власти известија за десетици руски ракетни и беспилотни напади на 21 април, додека напад на украинско беспилотно летало беше пријавен во рускиот регион Белгород.
Извештаи за руски напади на повеќе украински градови се објавени и денеска рано наутро, а меѓу целите бил и украинското пристаништен град Одеса, каде што станбени објекти биле погодени со беспилотни летала.
Во врска со иницијативата за ставање крај на војната во Украина завчера американскиот претседател, Доналд Трамп изјави оти се надева дека двете земји неделава ќе постигнат договор. Вчера, пак, во изјава за новинарите во Белата куќа, тој најави дека во следните три дена ќе излезе со детали за посредничките напори во врска со војната во Украина.
„Ќе ви ги дадам сите детали во следните три дена. Но, имавме многу добри состаноци за Украина и Русија“,
изјави тој.
Рускиот претседател претходно вчера, изјави дека Москва е отворена за какви било мировни иницијативи и оти го очекува истото од Киев.
„Отсекогаш сме зборувале дека имаме позитивен став кон какви било мировни иницијативи. Се надеваме дека и претставниците на режимот во Киев ќе го чувствуваат истото“,
рече Путин на државната телевизија.
Портпаролот на Кремљ, Дмитриј Песков, појасни дека кога Путин рекол дека е можно да се разговара за прашањето за ненапаѓање цивилни цели, тој мислел на директни преговори меѓу Русија и Украина.
„Претседателот Путин и руската страна остануваат отворени за барање мирно решение. Ние продолжуваме да работиме со американската страна и, се разбира, се надеваме дека оваа работа ќе даде резултати“,
рече Песков за новинарите.
Песков одби да ги коментира изгледите за договор оваа недела, но ги поздрави коментарите на американскиот претставник Кит Келог дека Украина нема да може да се приклучи на НАТО.