Контролата за утврдување на резервите, доцна синоќа била прекината, но не била завршена и за да не дојде до некакви промени во текот на ноќта инспекторите на УЈП ги запечатиле објектите. Утрово пломбите биле отстранети и е продолжено со пописот кој треба да заврши денеска
Големата контрола на Управата за јавни приходи (УЈП) на 84 објекти од синџирот маркети КАМ, во која учествуваат над 300 инспектори, е насочена кон утврдување на магацинските резерви во овие маркети, потврдија од Управата за „360 степени“.
„Управата за јавни приходи кај даночниот обврзник КАМ ДОО Илинден започна со извршување надворешна контрола согласно Законот за даночна постапка за увид во состојба на залихите на трговска стока во магацин и продавници со цел констатирана на фактичката состојба на залихите и споредба со книговодствената евиденција. Контролата произлегува од низа нерегуларности утврдени со контролите по Законот за регистрирање на готовинските плаќања во повеќе маркети на територијата на цела држава по однос на примена на даночна стапка“,
велат од УЈП за „360 степени“.
За исходот, велат оттаму, не можат да информираат од причина што согласно членот 9 од Законот за даночна постапка, инспекторите се должи да ги чуваат како деловна тајна сите документи, информации и податоци до кои дошле во даночна, прекршочна или судска постапка.
„Согласно член 9 став 3 од истиот закон, обврската за чување на даночна тајна не е повредена, ако документ, факт или податок се изнесе во текот на даночната, прекршочната или судската постапка или пак одреден документ, факт или податок се изнесе со писмена согласност на даночниот обврзник“,
велат од УЈП.
Утрово, за што во јавност излегоа и информации и фотографии, дел од маркетите КАМ осамнаа со пломби и жолта лента на вратата, а подоцна во текот на денот во дел од нив што ги посетивме на влезот пишуваше дека во тек е попис.
Во одговорот од УЈП, пак, наведуваат дека пломбите биле ставени бидејќи пописот на резервите не завршил вчера, а биле отстранети утрово кога инспекторите повторно влегле за да го завршат пописот.
„Заради прекин на пописот во доцните вечерни часови на 21/03/2022 година и обезбедување на просториите со цел да не настанат евентуални измени во фактичката состојба на залихите во продавниците и магацините, Управата за јавни приходи, согласно член 23 од Законот за УЈП, изврши запечатување на објектите. Сите објекти во раните утрински часови на 22/03/2022 година се отворени, односно службениците од УЈП ги отстранија пломбите во присуство на вработените на даночниот обврзник и со пописот се продолжува во текот на денешниот ден и се планира да заврши денес“,
велат од УЈП.
Објаснувајќи зошто биле ставени пломбите, од УЈП демантираат дека објектите биле запечатени поради прекршочни санкции.
„Напоменуваме дека не станува збор за извршување прекршочни санкции запечатување на објектите согласно Законот за регистрирање на готовинските плаќања, истото е неточна информација која е проследена во јавноста и целосно ја демантираме“,
велат оттаму.
Од УЈП укажуваат дека увидот во резервите е нивна редовна активности и тој може да се врши и при редовни контроли за ДДВ како метод преку кој го проверуваат приходот на даночните обврзници. Такви контроли за резервите, додаваат од Управата, изминатиот период вршеле и во продавници за облека, во трговијата на мало со овошје и зеленчук, а ќе продолжат и во иднина за сите сознанија што ќе ги добијат за евентуални нерегуларности.
Во објаснувањето тие се повикуваат дека контролите се во согласност со членовите 57 и 63 од Законот за даночна постапка.
„Согласно член 53 од Законот за даночна постапка, Управата за јавни приходи ги користи сите доказни средства потребни за утврдување на фактите битни за оданочување, а особено:
1. собирање информации од даночниот обврзник и од други лица;
2. одредување вештаци;
3. прибавување на исправи и списи,
4. излегување на увид, и
5. проверка на веродостојноста на книжењата и другите евидентирање со примена на финансиско-сметководствена форензичка анализа.
Согласно член 63 од истиот закон, Управата за јавни приходи врши непосреден увид кога е потребно за утврдување или разјаснување на фактите битни за оданочување. Даночниот обврзник или трето лице назначено од негова страна мора да присуствува на увидот“,
велат од УЈП додавајќи ги и одредбите на членот 64 дека сопственикот е должен да дозволи да се изврши увид во текот на вообичаеното време.