Синдикатот за угостителство и туризам при Конфедерацијата на слободни синдикати на денешната прес-конференција побара поголеми работнички права, посочувајќи дека луѓето од овие дејности се доведени на раб на егзистенција.
„Вината што голем дел сме непријавени и не можеме сега да ги оствариле правата, не е само наша, туку и ваша, затоа што затаил системот на контрола, односно инспекторатите“,
истакна Влатко Николовски од Синдикатот за угостителство и туризам на денешната прес-конференција.
Од Синдикатот побараа вработените да бидат пријавени на целосно работно време и да им биде платена прекувремената работа. Бараат и задолжителен К-15, кој велат им го враќаат на рака на рабодавците, но и бенефициран стаж.
„Ние сме најзагрозена гранка – изложени сме на физички напор, работиме во секакви услови. Најважно е да се успее да добиеме бенефициран стаж. Не отвораме војна против никого, сакаме само да се има слух и за нас и да се преземе конкретно решавање на нашите барања, бидејќи сме запоставени“,
порача Николовски.
Според проценките на Синдикатот, во угостителството се пријавени околу 20 000 работници, а во овој сектор работат околу 70-80 000 работници.
„Тие што биле пријавени се пријавени на 4 часа. Ние како способни луѓе и кадар за работа сме пријавени по 4 часа, а работиме по 10-12 часа. Затоа ова мора да допре до јавноста и да се реши овој проблем“,
изјави Николовски.