Основното училиште во Чаир, кое до пред неколку дена се викаше „Рајко Жинзифов“, денеска доби табла со новото име „Имри Елези“, а на постапувањето на таблата присуствуваше и министерот за образование и наука Арбер Адеми.
Тој во изјава за медиумите рече дека имињата на училиштата не ги определува Владата ниту министерот, туку оти иницијативата почнува од училишниот одбор бидејќи ова прашање се решава со Статутот на училиштето, а предлагач на статутот на училиштето е училишниот одбор.
„Потоа треба да добие одобрение и од основачот, т.е. општинскиот совет, па потоа на крајот согласност и од министерот за образование и наука. Така што министерот за образование и наука дава согласност за статутот што го предлага училишниот одбор“,
рече Адеми.
Министерот посочи дека секогаш кога од него како министер за образование и наука било побарано согласност за преименување на училиште или промена, измена или дополнување на статутот на училиштето, со кој се именуваат и училиштата, добиле согласност.
„Секогаш на нашите обраќања сме истакнале дека имињата на училиштата не треба да се политизираат, туку, напротив, имињата на училиштата треба да ја изразуваат волјата на граѓаните, каде што е воспоставено тоа училиште, волјата на наставниците, на стручните работници, на родителите… Не би сакал да навлегувам во политизација и партизација на ваквите прашања кои се однесуваат на преименувања на конкретни училишта. Тие треба да се израз на волјата на граѓаните“,
изјави Адеми.
На настанот во Чаир присуствуваше и Елез Елези, братот на Имри Елези, кој им се заблагодари на сите што придонеле за ваквиот чин на именување на училиштето со името на неговиот брат и порача дека ваквите настани не треба да се мешаат со политика.
Заедно со ова училиште, ново име доби и ОУ „Никола Вапцаров“, кое сега се вика „Исмаил Ќемали“.
*Поврзани вести:
Училиштата „Рајко Жинзифов“ и „Никола Вапцаров“ во Чаир предизборно добија нови имиња
Централен регистар: Постапката за преименување на училиштата во Чаир кај нас е кристално чиста
Заев контра Адеми: Незаконска е постапката за промена на имињата на школите во Чаир