За разлика од лани, пријавени биле трипати повеќе оштетени учебници за кои е потребна замена, односно 18 000 наспроти 6 000
Министерството за образование и наука (МОН) најави дека сите искинати и неупотребливи учебници кои училиштата ќе ги пријават во електронскиот систем на Министерството ќе бидат заменети со нови пред почетокот на новата учебна година, 1 септември. За оваа намена се обезбедени соодветни буџетски средства, со цел да се избегне разочарување кај учениците и нивните родители кои оправдано реагираат на состојбата на дел од учебниците.
Ова го истакна министерката за образование и наука Весна Јаневска на денешната прес-конференција посветена на набавката на учебници за основци и средношколци за учебната 2025-2026 година.
„Овој предизвик воопшто не треба да постои. Секое училиште има комисија за учебници која лесно може да процени дали еден учебник може или не може да се употребува, и тоа што не е за употреба не смее да се враќа во библиотечниот фонд и потоа некому да се доделува. Треба да се извести Педагошката служба при министерството и потребниот тираж ќе биде надополнет“,
рече Јаневска, изразувајќи очекувања за поголема ажурност на членовите на училишните комисии за учебници.
Таа рече дека оштетени учебници се пријавуваат во текот на мај, а Педагошката служба го продолжила рокот. За разлика од лани, биле пријавени трипати повеќе оштетени учебници за кои е потребна замена, односно 18 000 наспроти 6 000. Доколку има потреба, Јаневска рече дека системот за пријавување повторно ќе биде отворен за да биде дополнет тиражот за обнова на учебници. Годишно, во просек, Министерството издвојува околу 660 милиони денари за набавка на учебници.
„Замената на овие, засега 18 000 учебници, се дел од над 500 000 учебници што ги обезбедува МОН за сите предмети во основното и во средното образование“,
кажа Јаневска.
Министерката потсети дека учебниците од прво до трето одделение секоја учебна година се печатат во полн тираж, со оглед дека станува збор за таканаречени „работни учебници“ кои содржат материја што се пополнува со пишување, боење и сечење.
Јаневска рече и дека нови учебници со надградена содржина ќе има и за седмо одделение, бидејќи од септември започнува примената на нови наставни програми. Таа појасни дека е извршена модификација на Концепцијата за основно образование на претходната влада, при што на барање на пошироката јавност и наставниот кадар, предметите како историја и географија, хемија и физика, кои претходно беа предвидени за интегрирање, повторно се одвоени.
„Поради ова, постојат нови наставни програми и нови одобрени учебници кои наскоро ќе влезат во процес на печатење“,
реча таа.
Министерката кажа и дека првпат по шест години, учениците во основните училишта ќе имаат учебници по сите странски јазици.
„Цели шест години не беа набавени учебници по англиски, француски, германски и така натаму. Како нова влада се заложивме уште минатата година да го спроведеме овој процес и ќе успееме да го завршиме. На 1 септември, за сите странски јазици во основните училишта ќе има нови учебници“,
потврди Јаневска.
Според неа, нови учебници по дел од предметите ќе има и во гимназиското и во средното стручно образование.
Јаневска нагласи дека ова е втора учебна година по ред во која ќе има навремена испорака на учебници, што, како што истакна, не беше пракса претходните седум години.
Според министерката, учебниците се еден од клучните фактори за квалитетот на образовниот процес, покрај мотивираните наставници, наставните програми и инфраструктурата.
Јаневска посочи и дека во учебната година што заврши, за околу 17 000 е помал бројот на основци и средношколци отколку пред седум години, што најмногу се должи на иселувањето. На странски универзитети студираат околу 5 000 македонски студенти.