44 штабни офицери и вод за обезбедување од утре ќе бидат распоредени во главната команда на мисијата и командата „Запад“
Армијата на Република Северна Македонија како 30-та земја членка на НАТО првпат директно учествува во мисијата КФОР.
Утре во првата ротација 44 припадници на Армијата ќе се упатат во мисијата на НАТО во Косово, составена од штабни офицери и вод за обезбедување, кои ќе бидат распоредени во главната команда на мисијата и командата „Запад“.
За нив утре во касарната „Илинден“ во Скопје ќе биде организирана свеченост по повод нивното заминување.
Од АРМ соопштија дека припадниците на Армијата како подготовка поминале низ потребниот процес на обука и селекција каде што се извежбувале и обучувале за изведување на задачи што ги очекуваат за време на мисијата.
Припадниците на нашата армија во изминатите 18 години учествуваа во мировните мисии ИСАФ и „Одлучна поддршка“ во Авганистан и мисиите „Слобода за Ирак“, АЛТЕА во Босна и Херцеговина и УНИФИЛ во Либан.
Ова е првпат Армијата на Република Северна Македонија, како 30-та земја членка на НАТО, директно да учествува во мисијата КФОР, а во досегашниот период учествуваше посредно преку обезбедување логистичка поддршка за НАТО преку координативниот центар за поддршка на земјата домаќин, кој вршеше координација со силите на КФОР при царинските и граничните процедури на транспортот, вклучувајќи и други потреби на КФОР од доменот на логистичкото обезбедување.