Единствено средношколците во Тетово и во Гостивар ќе следат онлајн-настава во првите 14 дена од почетокот на учебната година, а во Кичево и Струга во првите седум дена
Учебна 2021/2022 година почнува денеска со физичко присуство и со посебни здравствени протоколи за сите ученици од основните и средните училишта. Исклучок се средните училишта во Тетово и во Гостивар, каде што наставата ќе се одвива онлајн во првите 14 дена од почетокот на учебната година, а во Кичево и Струга во првите седум дена. По завршувањето на овој период, како што вчера соопшти Владата, ќе бидат донесени нови мерки согласно развојот на ситуацијата.
Според министерката за образование и наука Мила Царовска, наставата со физичко присуство е од голема важност не само поради процесот на учење и социјализација, туку и заради заштита на менталното здравје на учениците. При вчерашната посета на основното училиште „Лирија“ во Општина Чаир, министерката изјави дека МОН е целосно подготвено за сите сценарија за учебната 2021/2022.
„Сите ние сме родители и сите ние бевме сведоци дека нашите деца учеа во минатата учебна година. Бевме сведоци и дека им недостасуваа другарчињата, наставничките и токму таа среќа ја враќаме во очите на децата. Но, ја враќаме и среќата на наставниците, затоа што тие не се целосни доколку не се во училница, не се со своите ученици“,
рече Царовска.
Иако вакцинацијата не е задолжителна за наставниот кадар и учениците, сепак бројот на вакцинирани наставници и останатиот кадар во училиштата е над 70 отсто, што, според Царовска, е добра основа за почеток на наставата со физичко присуство.
Министерот за здравство, Венко Филипче, изјави дека во претходните денови имало многу реакции на загрижени граѓани кои побарале наставата да се одвива онлајн. Според Филипче, тие се подготвени да дадат и други препораки доколку се влоши состојбата. Сите анализи во однос на училиштата во светот, според министерот, покажуваат дека учебната година треба да започне со физичко присуство, оти онлајн наставата е на штета на учениците. Секако, има исклучоци за ученици кои имаат хронични заболувања или имаат болни членови во семејството кои наставата ќе ја следат онлајн.
Според Филипче и Царовска, претходната учебна година покажала дека немало ниту една интерна трансмисија кај учениците кои посетуваа настава со физичко присуство.
Од УНИЦЕФ апелираа до целото општество да се вложи напор училиштата до останат безбедни и отворени. Претставникот на УНИЦЕФ, Патриција ди Џовани вели дека отворањето на училиштата за настава со физичко присуство е критичен чекор за секое дете да има пристап до квалитетно образование со кое се градат и се признаваат вештините што им се потребни на децата и адолесцентите – вклучувајќи јазична и математичка писменост, дигитални, претприемачки и вештини за работа.