Средношколци од неколку скопски училишта утрово ја бојкотираат наставата собирајќи се во холовите во знак на протест против високото ниво на загаденост на воздухот. Тие се придружуваат на денешниот „Марш за нашите животи! СТОП за 3.500 жртви од загадениот воздух!“ организиран од „Зелениот фронт“.
На социјалните мрежи се појавија фотографии од средните училишта „Никола Карев“ и „Раде Јовчевски Корчагин“, на кои се гледа група ученици како се собрани прво во дворот, а потоа во холот на училиштата.
Маршот ќе почне во 17 часот пред Министерството за животна средина и ќе продолжи пред Владата во 18 часот.
Тие деновиве се организираа преку социјалните мрежи и ќе се приклучат на редовните пeточни протести што ги организира „Петоци за иднината Скопје“ (Fridays For Future Skоpje) во рамки на движењето на шведската тинејџерка Грета Тунберг.
Меѓутоа, од скопскиот огранок на ова движење информираа дека на учениците неколку дена им се вршени притисоци од директори на средни училишта денеска да не ја бојкотираат наставата и да не учествуваат во маршот.
„Додека во остатокот од Европа образовните институции ги охрабруваат младите да учествуваат во климатските штрајкови секој петок, на тој начин развивајќи ја свеста за климатските промени, кај нас ниту еколошката вонредна состојба и незапаметената криза со аерозагадувањето не е доволна причина кадарот да се солидаризира со нивните деца, чиј единствен грев е што бараат да дишат чист воздух“, велат од движењето.