Мајката на ученикот овој случај го пријавила во Комисијата за спречување и заштита од дискриминација, која пред една недела утвридила директна дискриминација на училиштето врз детето, врз основа на род, во областа на образованието
Ученик во основното училиште „Свети Климент Охридски“ во гевгелиско Миравци плачејќи сам си ја исекол косата бидејќи фризурата не им се допаѓала на класната, педагогот и на директорката. Мајката на момчето за случајот на почетокот на септември минатата година ја известила Комисијата за спречување и заштита од дискриминација, која утврдила дискриминација, пренесува порталот „сдк.мк“.
На 1. септември момчето тргнало во училиште со коса фатена во опавче. Истиот ден директорката на училиштето усно ѝ наредила на класната раководителка ученикот да го отстрани опавчето и да дојде со „средена“ фризура.
Потоа, детето само си ја скратило косата над очите.
Мајката на ученикот овој случај го пријавила во Комисијата за спречување и заштита од дискриминација, која пред една недела утвридила директна дискриминација на училиштето врз детето, врз основа на род, во областа на образованието.
Според овој предмет во Комисијата мајката рекла дека нејзниот син немал долга коса и покрај пораката од директорката тој да дојде „среден“ на училиште.
Мајката за овој случај побарала разговор со директорката, која ѝ посочила дека во училиштето има кодекс на облекување.
Таа била предупредена и од педагогот на училиштето дека ако момчето не ја среди фризурата, ќе добие укор, што е мерка пред бркање од училиште.
По ова, мајката случајот го пријавила и кај Народниот правобранител.
Во одлуката за утврдена дискриминација, Комисијата дава и препораки за училиштето.
„Се препорачува училиштето ‘Свети Климент Охридски’ од Миравци да се воздржи од родово-стереотопни дејствија и донесување на родово-стереотипни правила за однесување во училиштето како во случајот. Се препорачува училиштето да ги ревидира интерните акти, како куќниот ред, од аспект на родова еднаквост, со цел преку нив да се промовира родова еднаквост, место родови стереотипи“,
пишува во препораката од Комисијата.
Доколку училиштето не ги почитува препораките на Комисијата, како што велат оттаму, ќе биде пријавено пред суд.