Утрово во 07:10 часот, полициски службеници од ОВР Кичево го лишија од слобода Е. А. (48) од селото Србјани, Кичевско, поради сторено кривично дело убиство, информира Министерството за внатрешни работи (МВР).
„Околу 7 часот во ПС Кичево од Итната медицинска помош Кичево, било пријавено дека кај нив се јавил Е. А. и кажал дека во семејната куќа во с. Србјани со секира ги нападнал неговите родители. Со возило на Итна медицинска помош двете лица се пренесени во Медицинскиот центар Кичево, каде У. А. (74), татко на сторителот, им подлегнал на повредите, а Ф. А. (67), мајка на сторителот, е во неконтактибилна состојба. Е. А. е лишен од слобода и по документирање на случајот, против него ќе биде поднесена кривична пријава“,
пишува во соопштението од МВР.
За случајот се огласија и од кичевското обвинителство. Оттаму велат дека е извршен увид на лице место во семејната куќа во селото Србјани, прибрани се траги кои ќе бидат предмет на вештачење. Посочуваат дека лицето е задржано и во текот на денот ќе следи постапка.