Масакрот во синагогата во 2018 година се смета за еден од најсмртоносните антисемитски напади во американската историја
Поротата во американскиот федерален суд досуди смртна казна на напаѓачот Роберт Бауерс кој убил 11 лица во масакрот во синагогата во градот Питсбург (Пенсилванија) во 2018 година.
За да се изрече смртна казна, беше потребно сите 12 члена на поротата да бидат едногласни.
Обвинителите претходно во судница побараа поротата да гласа за смртна казна откако истиот состав претходно го прогласи напаѓачот за виновен за сите 63 точки од обвинението.
Во завршните зборови обвинителите тврдеа дека ваквата казна е неопходна бидејќи 50-годишникот обвинет за нападот и понатаму продолжува да се залага за омраза кон Евреите и не покажал каење за своите дела.
„Ова е случај кој бара најстрога казна предвидена со законот – смртна казна“,
рече обвинителот Ерик Олшан.
Одбраната на Бауерс, пак, тврдеше дека тој има проблеми со менталното здравје и дека затоа има заблуди за еврејскиот народ.
Во одлуката што ја донесе поротата беше посочено дека одбраната не успеала да докаже дека напаѓачот има ментално растројство или дека го извршил злосторството во момент кога имал ментално или емоционално нарушување.
Масакрот во синагогата во 2018 година, се смета за еден од најсмртоносните антисемитски напади во американската историја.
Единаесетте верници кои тогаш ги уби вооружениот Бауерс беа на возраст од 54 до 97 години. Седум други лица беа повредени, вклучително и пет полицајци кои први стигнаа да интервенираат.