На вкупно 25 години затвор е осуден Мирослав Марчек, поранешен војник кој призна дека ги извршил убивствата во 2018 година врз истражувачкиот новинар од Словачка, Јан Куцијак и неговата свршеница, Мартина Кушнирова.
„Оваа пресуда на жалбениот суд против поранешниот војник, Мирослав Марчек, е конечна и на неа веќе нема простор за жалби“,
потврди портпаролот на судот Александра Вазанова, пренесува МИА.
На почетокот на оваа година, Марчек призна дека во февруари 2018 година ги убил Куцијак и неговата свршеница Кушнирова, пукајќи им во глава и гради.
Со оваа пресуда Врховниот суд ја поправи поблагата казна на Специјалниот кривичен суд во Пежинок, град во близина на Братислава. Тамошните судии во април годинава го осудија Марчек на 23 години затвор, а како олеснителни околности му ги земале фактот дека се изјаснил за виновен и што на истражители им дал вредни информации за луѓето за кои се верува дека го нарачале убиството.
Јавниот обвинител, меѓутоа, инсистираше на максимална казна заради тежината на кривичното дело.
Истражувачкиот новинар Куцијак објави повеќе од десетина написи за претприемачот Маријан Кочнер. Во една статија објавена непосредно пред убиството, Куцијак го обвини Кочнер дека е вмешан во шема за даночна измама и успеа да докаже дека на тој начин илегално заработил милиони евра.
Куцијак стана познат по откритијата за затајување данок и бројни измами на деловни луѓе поврзани со владејачката партија на земјата Смер.
Тој, исто така, пишуваше и за поврзаноста на словачки државјани со италијанската мафијашка организација Ндрангета.
Извештајот објавен по неговата смрт за можни врски помеѓу италијански мафијашки кланови и словачки државни службеници предизвика масовни протести против корупцијата и доведе до оставка на тогашната влада.