Маскирани лица фрлаа камења врз просториите на владејачката Српска напредна партија на улицата Цвијиќева во Белград за време на вчерашниот антивладин протест, на што жандармеријата одговори со солзавец, потиснувајќи ги демонстрантите
Протести во повеќе градови во Србија се одржаа и денеска, но за разлика од претходните денови вечерва, како што пренесе Н1, беше мирно
Министерството за внатрешни работи на Србија денеска соопшти дека две лица се уапсени поради сомнение дека со камења учестувале во кршење на стаклото од излогот на просториите на Српската напредна партија (СНС) за време на вчерашниот протест во Белград, пренесе регионалниот сервис на Радио Слободна Европа (РСЕ).
Уапсените со иницијали С.П. и Т.Г. се товарат за кривично дело насилно однесување на спортски настан или јавен собир и според Министерството и на двајцата им е определено задржување од 48 часа.
Маскирани лица фрлаа камења врз просториите на владејачката Српска напредна партија на улицата Цвијиќева во Белград за време на вчерашниот антивладин протест, на што жандармеријата одговори со солзавец, потиснувајќи ги демонстрантите.
Српскиот претседател Александар Вучиќ истиот ден ги посети просториите на партијата, при што, меѓу другото, изјави дека ќе ја ослободи земјата одкако што кажа „овој терор и зло“.
Во претходните денови, протестите во Србија беа обележани со судири меѓу демонстрантите од една и полицијата и поддржувачите на власта од друга страна.
Причината за собирите се настаните во градовите Врбас и Бачка Паланка во Војводина што се случија на 12 август, кога поддржувачите на власта во Србија ги нападнаа демонстрантите со пиротехнички средства, по што тие ја обвинија полицијата дека не реагирала на овие напади.
Антивладините протести предводени од студенти во блокада во Србија траат веќе девет месеци, а причината е смртта на 16 лица при падот на настрешницата на реконструираната Железничка станица во Нови Сад.
Протести во повеќе градови во Србија се одржаа и денеска, но за разлика од претходните денови вечерва, како што пренесе Н1, беше мирно.
Граѓани денеска претпладне се собраа пред зградата на Основниот суд во Нови Сад на покана на студентите во блокада со цел да извршат притисок врз судските власти да ги ослободат, како што велат, политичките затвореници, односно приведените колеги во антивладините протести
Во Белград, граѓаните се собраа пред седиштето на ЈЗО, а потоа и пред Владата. Протестот се одржа и во Панчево, каде студент е приведен поради наводен напад врз службено лице.
Собири, исто така, се одржаа и во Краљево, Рума, Зајечар, Чачак, Бечеј, Ниш и на други места.