Поради исполнети услови за определување на мерката притвор, јавниот обвинител до Основниот кривичен суд – Скопје ќе достави предлог за одредување притвор за сите 12 осомничени лица
Основното јавно обвинителство за гонење на организиран криминал и корупција (ОЈО ГОКК) и Одделот за сузбивање на организиран и сериозен криминал спроведоа голема акција во раните утрински часови, при што беа лишени од слобода 12 лица осомничени за криминално здружување и нелегална трговија со оружје, информираат попладнево оттаму.
Акцијата, како што велат од Обвинителството, е резултат на повеќемесечна предистражна постапка, а претреси се спроведени на повеќе локации во селата Брест, Инџиково и Арачиново, како и во скопските населби Ченто и Чаир.
Осомничените се товарат за кривични дела злосторничко здружување и неовластено изработување, држење, посредување и тргување со оружје или распрскувачки материјали. Дополнително, едно лице се сомничи и за неовластено производство и пуштање во промет на наркотични дроги, психотропни супстанции и прекурсори.
Од Обвинителството велат дека јавниот обвинител донел наредба за спроведување истражна постапка против сите 12 лица. Според Обвинителството, постои основано сомнение дека во периодот од април до декември 2025 година тие создале злосторничко здружение за вршење кривични дела казниви со затворска казна од најмалку три години.
Првоосомничениот, се додава во објаснувањето од Обвинителството, неовластено набавувал огнено оружје и муниција од засега непознати лица од Република Косово.
Оружјето потоа нелегално го пренесувал на територијата на Северна Македонија и го складирал на безбедни локации во селата Сингелиќ и Брест.
„Од прибраните докази произлегува дека групата имала јасно распределени улоги. Првоосомничениот, како еден од организаторите, давал насоки за пронаоѓање купувачи и за неовластено посредување во трговијата со огнено оружје и муниција. Еден од осомничените неовластено набавувал муниција и ги координирал активностите за доставување на оружјето до членовите на групата, додека друг го одржувал контактот со првоосомничениот и ја координирал доставата до непосредните купувачи“,
велат од Обвинителството.
Еден од осомничените, покрај трговијата со оружје, е осомничен дека неовластено продавал и кокаин.
Поради исполнети услови за определување на мерката притвор, јавниот обвинител до Основниот кривичен суд – Скопје ќе достави предлог за одредување притвор за сите 12 осомничени лица.