Конвенцијата на Советот на Европа за спречување и борба против насилството врз жените и семејното насилство, т.н. Истанбулската конвенција, е документ од 2011 година, потпишан од 45 земји и ЕУ
Станува збор за прв правно обврзувачки и сеопфатен меѓународен механизам за борба против насилството врз жените и семејното насилство
Аналитичарите ја толкуваат одлуката на Ердоган пред сѐ како негова желба да собере конзервативно гласачко тело во контекст на економските проблеми со кои се соочува земјата
Турција денеска официјално се повлече од меѓународниот договор насочен кон борба против насилството врз жените, т.н. Истанбулската конвенција, врз основа на одлука на претседателот Реџеп Таип Ердоган од март, што предизвика жестоки критики од домашната и меѓународната јавност.
Во повеќе турски градови во текот на денот се предвидени протести поради одлуката што стапи во сила синоќа на полноќ.
Конвенцијата на Советот на Европа за спречување и борба против насилството врз жените и семејното насилство, т.н. Истанбулската конвенција, е документ од 2011 година, потпишан од 45 земји и ЕУ.
Станува збор за прв правно обврзувачки и сеопфатен меѓународен механизам за борба против насилството врз жените и семејното насилство.
Конвенцијата обезбедува нова и детална меѓународна правна рамка за поефикасно искоренување на семејното насилство и насилството врз жените.
Одлуката на Ердоган да ја повлече својата земја од конвенцијата, иако бројот на убиства на жени во Турција се зголеми во текот на изминатата деценија, предизвика гнев кај организациите за заштита на правата на жените и критики од ЕУ, Вашингтон и Високиот комесаријат за човекови права на ОН.
Во образложението на турската Влада се оценува дека Истанбулската конвенција „ги поткопува семејните вредности“ и „сака да ја прикаже хомосексуалноста како нормална“, бидејќи повикува луѓето да не бидат дискриминирани врз основа на сексуална ориентација.
За разлика од многу земји со мнозинство муслиманско население, хомосексуалноста не е забранета со закон во Турција, но хомофобијата е широко распространета.
Аналитичарите ја толкуваат одлуката на Ердоган пред сѐ како негова желба да собере конзервативно гласачко тело во контекст на економските проблеми со кои се соочува земјата.
„Ова повлекување испраќа опасна порака до оние кои вршат насилство, осакатуваат или убиваат: им кажува дека можат да продолжат да го прават тоа со целосна неказнивост. Во однос на правата на жените, Турција се врати десет години наназад“,
изјави денеска шефицата на „Амнести интернешнл“, Агнес Каламард.
Минатата година 300 жени биле убиени во Турција од страна на нивните партнери или поранешни партнери, покажуваат податоците на Здружението за правата на жените „Да ставиме крај на убиствата на жени“.