„Се надевам и верувам дека и покрај тоа што Јавното обвинителство самото по своја вина се најде во една непријатна ситуација затоа што не веруваше на докази туку на лични и субјективни мислења, верувам дека има професионален капацитет, и тоа го заслужува овој настан како целина, да ја продолжи истрагата и републичкиот јавен обвинител веднаш да преземе мерки и активности во таа насока“, рече адвокатот по ослободителната пресуда за таткото на Вања
Денеска нема ни простор ни место за никаква победничка еуфорија, затоа што судот донесе една законита одлука, рече адвокатот Владимир Туфегџиќ по ослободителната пресуда за неговиот клиент Александар Ѓорчевски, таткото на убиената Вања Ѓорчевска.
Коментирајќи ја пресудата, Туфегџиќ во изјава на новинарите рече дека одлуката на Судот по својата суштина е празна затоа што од целиот процес не произлезе одговор на три клучни прашања и во таа насока ги критикуваше институциите што ја водеа истрагата.
„Зошто е киднапирано и убиено ова дете, не добивме одговор на прашањето зошто по секоја цена се инсистираше Александар да биде дел од оваа постапка иако од првиот момент се знаеше дека за него нема ниту еден доказ. Што значи дека институциите кои ја раководеле оваа истрага се должни да дадат одговори на овие прашања“,
рече адвокатот.
Институциите, како што кажа тој, особено треба да дадат одговор дали со инволвирањето на Александар Ѓорчевски во процесот, свесно бил направен обид за дефокус од она што треба да биде предмет на истрага, а обвинетиот Велибор Манев го кажал уште првиот ден дека од 2022 година се правеле и се кроеле планови и списоци за киднапирање и убивање луѓе поради што и се копале дупки по Македонија.
Според адвокатот, луѓето што учествувале во истрагата, од Обвинителството, полицијата до службата за државна безбедност треба да дадат одговор каде биле и што правеле цело време и како не биле откриени плановите на овие лица.
„Мислам дека е ред и Јавното обвинителство и началникот за сериозен и организиран криминал Дејан Димовски и Музафер Каришиќ, сите овие луѓе што учествувале во истрагата против Александар да дадат одговор, вклучително и службата за државна безбедност, каде биле, што правеле и како овие лица не се детектирале со време и дали овие лица имаат своја логистика некаде во некои институции. Тоа се прашања кои заслужува да ги добие, пред сè, јавноста и ние како општество и како држава за да бидеме сигурни дека утре ова нема да му се случи на некој друг родител на кој, не дај Боже, ќе му исчезне дете и ќе отиде во полициска станица да пријави и ќе заврши во притвор“,
рече Туфегџиќ.
Одговарајќи на новинарско прашање, тој рече дека кај неговиот клиент Александар Ѓорчевски нема расположение за поднесување кривични пријави, а во контекст на прашањето тој се осврна и на денешното барање на обвинителката Жаклина Крстевска-Јосифовска на Ѓорчевски да му биле продолжен куќниот притвор, иако судот му изрече ослободителна пресуда.
Неа ја поправи нејзината колешка, Ана Стојковиќ-Димитровска, која побара на Ѓорчевски да му биде укината мерка, што беше прифатено од судот.
Во оваа насока тој однесувањето на јавниот обвинител во текот на целата постапка го оцени како „потполно конфузно“, а посочи и на известувањата што уште лани ги доставил до Обвинителството и до судија на претходна постапка дека на Ѓорчевски му била вршена тортура, за кои до денеска немал добиено одговор.
„Се надевам и верувам дека и покрај тоа што јавното обвинителство самото по своја вина се најде во една непријатна ситуација затоа што не веруваше на докази туку на лични и субјективни мислења од Дејан Димовски и Музафер Каришиќ, верувам дека Јавното обвинителство има професионален капацитет, и тоа го заслужува овој настан, како целина да ја продолжи истрагата и републичкиот јавен обвинител веднаш да преземе мерки и активности да се продолжи истрагата во насока на која погоре посочив“,
рече Туфегџиќ.
Судијата Ивица Стефановски денеска ги прогласи за виновни и им одреди доживотни затворски казни на Љупчо Палевски-Палчо, Велибор Манев, Боре Видевски и Влатко Кешишев за убиствата на Вања Ѓорчевска и Панче Жежовски.
Секој од четворицата обвинети доби и по десет години затвор за кривичното дело грабнување на Вања Ѓорчевска.
Од друга страна, според судот, Обвинителството не успеало да докаже надвор од разумно сомневање дека четворицата обвинети го извршиле грабнувањето на Панче Жежовски, па за ова дело ги ослободи од обвинение. Во оваа смисла, Обвинителството го докажало само грабнувањето на 14-годишната Вања Ѓорчевска.
По изрекувањето на пресудата, судот го прифати барањето на Обвинителството на Палевски, Манев, Видевски и Кешишов да им биде продолжен притворот до моментот кога ќе почнат со издржување на затворските казни, односно до правосилноста на пресудата.
Денешната пресуда за еден од најгрозоморните случаи во поноивата историјата на државата беше донесена по судскиот процес кој траеше речиси осум месеци.