Адвокатот потенцира дека во текот на целата судска постапка не бил изведен ниту еден доказ од страна на Обвинителството со кој би се докажало дека Александар Ѓорчевски имал комуникација со првообвинетиот Љупчо Палевски
По завршните зборови на Обвинителството во случајот за убиството на Вања Ѓорчевска и Панче Жежовски, адвокатот Владимир Туфегџиќ, бранител на обвинетиот Александар Ѓорчевски, таткото на Вања, изјави дека завршниот збор на Обвинителството е „контрадикторен сам по себе“.
Според Туфегџиќ, Обвинителството детално ги опишало планот и дејствијата на останатите обвинети, со што, како што вели, директно докажува дека тие имале претходно разработен план, а притоа никаде не се споменува вмешаност или конекција со Александар Ѓорчевски.
Туфегџиќ потенцира дека во текот на целата судска постапка не бил изведен ниту еден доказ од страна на Обвинителството со кој би се докажало дека Александар Ѓорчевски имал комуникација со првообвинетиот Љупчо Палевски.
„Јас не знам како ќе се произнесе Судот, но сите денеска слушнавме дека Јавното обвинителство во завршните зборови го потврди она што го знаеме од првиот ден, а тоа е нема никаков доказ за било каква вмешаност или инволвираност на Александар, немаат ниту било каков доказ за некаква конекција и комуникација со Љупчо Палевски, како што стои во обвинителниот акт“,
рече Туфегџиќ.
Денеска, Обвинителството во своите завршни зборови побара максимална казна доживотен затвор за четворицата обвинети: Љупчо Палевски, Влатко Кешишев, Боре Видевски и Велибор Манев.
За таткото на Вања, обвинетиот Александар Ѓорчевски, обвинителката побара Судот да му ја одреди „соодветната затворска казна“. Таа истакна дека „нема потешка казна од загуба на дете и од живот со таква совест како во случајов на таткото на Вања, обвинетиот Александар Ѓорчевски“. Обвинителката, сепак, нагласи дека не тврдат оти сакал да му го убијат детето, но дека „учествувал во киднапирањето на ќерка си и бараме соодветна казна за тоа“.