Неказнивоста за кривични дела како насилства врз жени и ЛГБТИ заедницата е проблем кој сè уште трае, смета извршната директорка на Коалицијата „Маргини“, Ирена Цветковиќ.
Цветковиќ во вечерашната дебата на „360 степени“ вели Обвинителството споро постапува за вакви кривични дела.
„Конкретно со Обвинителството генерално има проблем кога станува збор за овој тип на кривични дела како насилство врз ЛГБТИ, случаите од ‘Јавна соба’ исто така се заглавени во Обвинителството. Има случаи на силување на жени за кои не се постапува по шест-седум месеци до година дена. Дури имаше случај во кој една жртва на силување чекаше 12 години за Обвинителството да покрене акт“,
рече Цветковиќ.
Активистите на ЛГБТИ заедницата уште пред десетина години протестираа поради неказнивост на насилниците во повеќе случаи, но истрагите и понатаму траат во Обвинителството и конкретни чекори не се преземени.