„Ертракторите“ дејствуваа два пати, но пожарот е се уште критичен и доста активен, а поради засилениот ветер се шири кон повисоките делови на сртот кон Општина Долнени, велат од ЦУК
Три „ертрактори“ на Дирекцијата за заштита и спасување интервенираат во гаснење на пожар во дабова и габерова шума, помеѓу селата Ореше и Богомила во Општина Чашка, информираат од Центарот за управување со кризи (ЦУК). Пожарот, како што додаваат од ЦУК, е критичен и доста активен, а поради засилениот ветер се шири кон повисоките делови на сртот кон Општина Долнени.
„Поради брзото ширење на пожарот и неможноста да се стави под контрола од силите кои интервенирале, во 14:36 часот, подигнати се трите ‘ертрактори“ на Дирекцијата за заштита и спасување и истите дејствуваа два пати, но според известувањето од одговорното лице на терен, пожарот е се уште критичен и доста активен, а поради засилениот ветер се шири кон повисоките делови на сртот кон Општина Долнени“,
се вели во соопштението од ЦУК.
Пријава до ЦУК, дека гори сува трева, стигнала денеска во 12:38 часот.
„Во 12:38 часот, во Центарот за управување со кризи, добиена е пријава за пожар на сува трева покрај железничката пруга кај м.в.Ореше, Општина Чашка. За кратко време, поради силен и променлив ветар, пожарот се прошири во дабовата и габеровата шума, помеѓу селата Ореше и Богомила. Поради пожарот, до 17 часот, во прекин беше и железничкиот сообраќај. Во гаснењето на пожарот учествувале екипи на ЈП „Национални шуми“ – подружница „Бабуна“ – Велес, како и лица од месното население“,
велат од ЦУК.