Денеска од земјава си замина Територијалната противпожарна единица и другата противпожарна опрема која беше дадена на помош од Бугарија, а во земјава сега останува другата странска помош од Словенија, Австрија, авионот на Романското воено воздухопловство
Сите села во чија близина беснеат пожари се обезбедени со сите оние методи кои ги користи било која противпожарна служба во светот, информира на денешната прес-конференција в.д. директорот на ЦУК Стојанче Ангелов.
Тој посочи дека се изорани местата и направена е тампон-зона преку која пожарот не може да премине. На линијата се поставени цистерни доколку пожарот премине од другата страна на тампон зоната да можат да дејствуваат и да не биде загрозено селото.
„Опасноста е намалена и сега сме концентрирани кон шумите. Предмалку пожарот над селото Будинари повторно се разгоре од нигде никаде. Вчера бев очевидец, на едно место само малку чадеше, за неколку минути имавме пламен до небото. Огнени јазици високи по десетина метри. Борот е лесно запаллива материја, на него има смола. Оганот не ги гори целите дрвја, но ја гори смолата и лисјата. Затоа и тешко се справуваме со него. Додека пожарите кои се во шума со бука и друго листопадно дрво се релативно поедноставни за справување“,
вели Ангелов.
Тој ги демантира информациите дека локалното население само изгаснало кој било пожар, каако и онаа која синоќа се појави на социјалните мрежи дека пожарот над Будинарци е веднаш до селото.
Пожарот над Будинарци има променливо темпо и на терен има сили кои постојано се подготвени да реагираат доколку пожарот тргне кон селото, рече Ангелов.
Помошник-раководителката на секторот за операции и координација Марија Милкова на прес-конференцијата информираше за состојбата со пожарите во моментов.
Во моментот, пожар им во Росоман, кавадаречко, во близина на мотелот Дреново. На терен, како што посочи, се екипи од ТППЕ од Кавадарци, полициски службеници. Сообраќајот на овој патен правец се одвива тековно, не е во прекин. Состојбата се следи.
Пожарот во делчевскиот регион село Разловци- Нов истевник, како што претходно соопшти ЦУК, е ставен во контрола, но тоа, како што посочи Милкова, не значи дека е целоно изгаснат, се уште на одредени места има чурење. Екипите на Територијалната противпожарна единица се таму, претставници на Армијата, локално население и одредени субјекти го следат пожарот за да не дојде до негово повторно разгорување.
Пожарот во Пехчевскиот регион, во село Будинарци е се уште активен. Таму гори висококвалитетна борова шума и таму на непристапен терен ангажирани се повеќе вработени од шумските стопанства, ЕВН, месно население, како и меѓународните тимови од Словенија, Австрија, трговски друштва. Армијата дејствува со 40 војници, во моментов таму дејствува и хеликоптерот на Армијата.
Друг пожар активен во моментов е во скопски Сарај, на потегот село Раовиќ – село Буковиќ – село Ласкарци. Таму гори нискостеблеста, мешана шума и висока трева на доста непристапен терен. Карактеристично, според Милкова, е тоа што оди горе кон сртот. На местото на пожарот има лица од Националниот парк Јасен, претставници од ТППЕ, се следи пожарот, таму ќе летаат и дронови за да го видат теренот и со време да биде локализиран овој пожар.
Пожарот во Петровец село Дивље, место викано Крушје е стигнат до селото, некаде позади црквата гори мешана шуима, пожарот се следи на лице место има претставници од ШС Караџица, 30 војници и единици на Теритоијалната притивпожарна бригада.
Активен пожар има и во Старо Нагоричане, село Дренак кој избувна синоќа во 20 часот, на потегот на село Дренак – село Жељубино – село Аљинце. На терен се претставници од Територијалната противпожарна бригада од Старо Нагоричане и претставници од месното население, но пожарот не е опасен.
„Пожарот во Прилеп, село Топлица, неколку дена таму гори, на три локации, во текот на денешниот ден таму околу 10 и 30 часот веќе дејствува авионот на Романското воено воздухопловство СПАРТА, очекуваме да се вратат и да ги дадат резултатите што ќе ги постигнат со гаснењето на овој пожар“,
информира таа.
Пожарот кој синоќа избувна во Штип, село Драгоево – село Селце е изгаснат. Пожарот во битолско село Велушина кој избувна синоќа во 19:30 часот едно време беше ставен под контрола , но во утринските часови повторно е активиран и делумно е локализиран.
Денеска од земјава си замина Територијалната противпожарна единица и другата противпожарна опрема која беше дадена на помош од Бугарија, а од ЦУК во име на целата земја им изразија голема благодарност за нивната укажана помош во првите денови кога ги дадоа на располагање нивните ресурси, кога беше најкритично. Во земјава сега останува другата странска помош од Словенија, Австрија, авионот на Романското воено воздухопловство.