Во моментов горат сува трева, грмушки и ниска деградирана ретка шума, но теренот е непристапен за гасење од земја со човечка сила
Пожарот кој беше активен на албанска територија на планината Галичица, со помош на ветрот, е веќе преминат на македонска територија кај граничниот Камен Ф9. Екипи на Националниот парк „Галичица“ и граничната полиција во моментов се на терен, затоа што постои опасност од проширување на пожарот и може да биде зафатена и заштитената зона од шума на Националниот парк „Галичица“, информираат од Центарот за управување со кризи, повикувајќи се на информации од РЦУК Охрид.
„Во моментов горат сува трева, грмушки и ниска деградирана ретка шума и поради тоа што теренот е непристапен за гасење од земја со човечка сила ќе се следи состојбата во текот на денешниот ден од страна на екипи на Националниот парк ‘Галичица’ и граничната полиција“,
велат од ЦУК.
Оттаму информираат дека во текот на вчерашниот и денешниот ден низ земјава се појавени неколку мали пожари на сува трева и стрништа, како и диви депонии кои беа за брзо време изгаснати од страна на надлежните институции.