Во Охридско најкритично е во населбата Далјан по излевање на реката Далјан. Екипи на јавните претпријатија интервенираат со механизација, а противпожарната бригада и екипи на ДЗС испумпуваат вода од поплавените објекти. Состојбата со поплавените објекти на улица „Прилепска“ во Кичево е сè уште непроменета. Противпожарната бригада, екипи на ДЗС и ЈП „Комуналец“ вршат испумпување и обезбедување на теренот, а Општина Кичево и Црвениот крст се грижат за лицата што беа евакуирани поради поплавите
Обилните врнежи од дожд доведоа до излевање на уште неколку реки во државата.
Според извештајот на Центарот за управување со кризи (ЦУК) до 18 часот попладнево, поради обилните дождови, во Штипско-кочанскиот Регион има зголемен водостој на реките и одводните канали. Локално е излеана Кочанска Река кај селото Горни Подлог, а излевање има и на Оризарска Река кај селото Грдовци. Интервенираат екипи на „Водовод Кочани“, односно екипи на Водостопанство „Брегалница“.
„Зрновска Река има излевање пред вливот во Брегалница, а состојбата ја следи Регионалниот центар за управување со кризи (РЦУК). Злетовска Река и Брегалница се со зголемен водостој, но без излевање“,
наведуваат од ЦУК.
Во Охридскиот Регион најкритично е во населбата Далјан по излевање на реката Далјан. Со механизација интервенираат екипи на ЈП „Водовод“, ЈП „Нискоградба“ и ЈП „Комуналец“, а противпожарната бригада и екипи на Дирекцијата за заштита и спасување испумпуваат вода од поплавените објекти.
„Кај Коселска Река, во правец на селата Ливоишта и Вапила, Јавното комунално претпријатие и ЈП ‘Нискоградба’ преземаат мерки за заштита на патот“,
додаваат од ЦУК.
Состојбата со поплавените објекти на улица „Прилепска“ во Кичево е сè уште непроменета. Противпожарната бригада, екипи на ДЗС и ЈП „Комуналец“ вршат испумпување и обезбедување на теренот, а Општина Кичево и Црвениот крст се грижат за лицата што беа евакуирани поради поплавите.
Во Општина Битола се вршат контроли на терен од страна на регионалниот ЦУК и општинските служби, ЈП „Комуналец“ интервенира кај населбата Стрчин, екипи на „Македонија пат“ расчистуваат на регионалниот пат Р-2333, а „Водостопанство“ ја следи состојбата на реките Шемница и Црна.
Во Ресен и Демир Хисар се врши испумпување на вода и заштита на загрозени површини. Состојбата во Куманово, Липково и Крива Паланка ја следат РЦУК, општините и „Водостопанство“, а „Македонија пат“ и комуналните претпријатија вршат превентивно посолување и расчистување на ризични патни делници.
„Општина Тетово со механизација интервенира на патиштата кон селото Ѓермо и месноста Бањиче. Во Мала Речица полицијата и инспекциските служби постапуваат по уривање на потпорен ѕид. Во Желино се интервенира по излевање кај Стримница и Палатица. На Попова Шапка, по координација со РЦУК Тетово, приватна фирма со механизација го расчистува патот. Во Гостивар, ЈП ‘Комуналец’ и ‘Водостопанство’ преземаат мерки по пријавени излевања“,
додаваат од Центарот за управување со кризи.