Директорот на ЦУК, Стојанче Ангелов, кажа дека е можно да се работи за несреќен случај и мечката да нападнала доколку била исплашена, но, како што додава, институциите треба да испитаат дали можеби се работи за агресивна мечка. Вели дека во последните десетици години не се регистрирани напади од мечки, па затоа треба да се види дали оваа мечка е нешто поагресивна и треба да биде цел на отстрел
Министерството за внатрешни работи (МВР) целосно да го расветли случајот со мечката, која пред два дена нападна 76-годишник од селото Пласница, побараа денеска од Центарот за управување со кризи (ЦУК) велејќи дека сакаат да дознаат што точно се случило и која е причината за нападот на мечката.
Директорот на ЦУК, Стојанче Ангелов, на денешната прес-конференција кажа дека е можно да се работи за несреќен случај и мечката да нападнала доколку била исплашена, но како што додава, институциите треба да испитаат дали можеби се работи за агресивна мечка. Вели дека во последните десетици години не се регистрирани напади од мечки, па затоа треба да се види дали оваа мечка е нешто поагресивна и треба да биде цел на отстрел.
„Ние како ЦУК сме против убивање на мечките, но зборуваме за опасни мечки кои нападнале човек. Доколку некоја мечка нападнала човек и истата може повторно да нападне и да повреди човек, јас сум на став дека истата треба да биде застрелана. Сега само ја придвижуваме процедурата пред надлежните министерства“,
изјави директорот на ЦУК, Стојанче Ангелов.
Ангелов на денешната прес-конференција кажа дека од Министерствата за земјоделство и за екологија е побарано да се изврши процена за евентуалното исполнување на условите за отстрел на мечката која го нападна и му нанесе повреди на 76-годишникот. Иако е заштитена со закон, евентуалниот отстрел на мечката, како што посочи директорот на ЦУК, е во согласност со член 16 став 5 од Законот за ловство.
„Во Законот за заштита на природата е предвидено дека отстрел на диви животни се врши врз основа на претходно добиена дозвола од министерот надлежен за вршење на работите од областа на ловството, а врз основа на претходно прибавено мислење од министерот надлежен за вршење од работите на работите од областа на заштита на природата“,
потенцира Ангелов.
На новинарско прашање за дислоцирање на мечките во другите делови од државата, директорот на ЦУК истакна дека тоа е чувствителна тема поради комплексноста на успивањето и пренесувањето на овие животни од едно на друго место, но и поради потенцијалната можност за вознемирување на жителите на местото на дислокација. Според Ангелов, жителите на Маврово и Ростуше, сепак, се навикнати на мечките и генерално немаат проблеми.
Од ЦУК вчера информираа дека на потегот помеѓу селата Пласница и Ораоец пред два дена мечка нападнала 76-годишник. Селата се оддалечени на околу 70 километри од Националниот парк „Маврово“ од каде што мечките во последно време почнаа зачестено да се симнуваат во населените места во потрага по храна.