Изминатото деноноќие, како што велат од ЦУК, имало 33 пожари на отворен простор, од кои 29 се изгаснати
Два активни и исто толку пожари се под контрола утринава на територијата на државата, информираат од Центарот за управување со кризи (ЦУК).
Активни се пожарите во селото Никуштак, во Општина Липково, каде горат нискостеблеста деградирана шума и дабова шума, и тој кај селата Варвара и Драчевица во Општина Студеничани, каде е опожарена мешана шума и ниска вегетација.
Од ЦУК велат дека под контрола се пожарите на Дрџински рид во селото Русиново, Општина Берово, каде што горат дабова и букова шума и папрат, како и тој на депонијата „Вардариште“ во Општина Гази Баба.
Изминатото деноноќие, како што велат од ЦУК, имало 33 пожари на отворен простор, од кои 29 се изгаснати.
Во најголем дел од изгаснатите пожари, кои биле во повеќе општини, гореле ниска вегетација и ѓубришта.